Gazeta Si – Partizani e ka nisur këtë kampionat me fitore (1-0), por sa shumë ka vuajtur përballë Laçit. Një gol i shënuar në kohën shtesë nga Maget ka çliruar trajnerin Zekiç dhe të tijtë. Për të kuqtë kjo ishte ndeshja e parë, pasi ajo me Teutën u shty për shkak të angazhimit në Ligën e Konferencës nga kampionët në fuqi të Superiores.
Në pjesën e parë nuk munguan rastet nga të dyja skuadrat. Laçi iu përgjigj mirë Partizanit, ndërsa pjesa e dytë ishte e gjitha nën kontrollin e të kuqve. Goli do të vinte vetëm në shtesë, nga një goditje këndi, ku Maget devijoi saktë me kokë.
Trajneri Zekiç kishte bërë disa ndryshime në formacion, duke lënë në stol Sotën, Koçijan, Hadrojin, Muratajn dhe ndonjë tjetër. Në pjesën e dytë ai shtoi forcat sulmuese, por skuadra e kuqe nuk kishte kthjelltësinë për të depërtuar në mbrojtjen e Laçit. Megjithatë, ndeshja u zgjidh dhe të kuqve u mbetet të shijojnë 3 pikët.
Skerdi Bejzade ndërkohë ka debutuar me humbje në stolin e Laçit, ku u emërua vetëm pak ditë më parë. Pas barazimit 3-3 me Erzenin, drejtuesit kurbinas bënë ndryshimin në stol, duke larguar Stavri Nicën për të marrë Bejzaden.
U luajt sot edhe ndeshja tjetër e javës së dytë, ajo mes Kukësit dhe Egnatias, ku rrogozhinasit fituan thellë, 0-4. Rezultati flet qartë për dominimin total të Egnatias, ndërsa Kukësi në dy ndeshjet e para ka pësuar plot 7 gola. Renditjen e Superiores e kryeson Skënderbeu, me 6 pikë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
