Gazeta Si – Ylber Ramadani është lojtari i radhës i Kombëtares që ka zbarkuar në Serinë A. Menjëherë ai ka fituar fanellën e titullarit te Leçe, ku që javën e parë të kampionatit ishte protagonist në atë fitore 2-1 ndaj Lacios.
Paraqitjen e mesfushorit kuqezi shtypi sportiv italian e ka vlerësuar me notën 6. Një vlerësim mesatar, por duhet të kemi parasysh faktin që ishte vetëm ndeshja e parë në kampionat dhe ndaj një kundërshtari të fortë si Lacio.
“Fitorja e parë. Faleminderit tifozëve tanë për mbështetjen e madhe”, – shkruan Ramadani në faqen e tij në Facebook. Mesfushori është në momentin më të mirë të karrierës. Vjen nga një sezon shumë pozitiv te Aberdini dhe Serinë A e ka nisur në mënyrën e duhur.
Ramadani duket një nga lojtarët më në formë të Kombëtares në prag të ndeshjeve kualifikuese me Çekinë dhe Poloninë, që luhen në shtator. Trajneri Silvinjo e llogarit titullar të rëndësishëm në formacionin kuqezi, ndërsa kalimi në Serinë A do ta ndihmojë edhe më shumë të rritet në aspektin individual.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
