Gazeta Si – Lauren Hemp dhe Alesia Ruso janë ngjitur në kuotën 3 të golave në renditjen e shënueseve më të mira të Botërorit, por mbi të gjitha kanë kualifikuar Anglinë për në finalen e Kupës së Botës, ku do të ndeshet me Spanjën.
Një gjysmëfinale në transfertë për anglezet. Ndeshja u luajt në ‘Accor Stadium’ të Sidneit, që natyrisht ishte në favor të australianeve, të zonjave të shtëpisë. Por ky fakt nuk i frenoi favoritet për fitimin e Kupës së Botës në futbollin e femrave për t’u kualifikuar.
An Tone, sulmuesja e Mançester Junajtid, u dha britanikeve mundësinë ta mbyllnin në avantazh pjesën e parë. Australia reagoi mirë në pjesën e dytë dhe Samanta Kerr, australiane me origjinë angleze, barazoi shifrat.
Në momentin kyç pastaj shënuan të njëjtat lojtare për ‘Luaneshat’, ato që kishin shënuar në çerekfinale ndaj Kolumbisë. Lauren Hemp dhe Alesia Ruso eliminuan edhe australianet dhe tani fjala e fundit i takon finales me Spanjën.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
