.png)
Nga Gazeta Si – Vashëz e hipur në një kalë pa fre,
e çliruar nga mbishkrimi embrional,
siluetë – vizatuar nga lapsat prej burri,
të shoh ende si kërkon të kthesh në lëkurë
gjithçka prej shpirti, lëkurën e ujit ke marrë për vete,
uji e ka zhvoshkur lëkurën që të mos dijë ku shkon…
Këto janë disa nga vargjet e poetes Natasha Lako, të cilat u lexuan para lexuesve dhe adhuruesve të poezisë së saj në Pogradec, në kuadër të Varg Festival.
Pas Durrësit dhe Sarandës, rrugëtimi i Varg Festival vijon në qytetin e Pogradecit, duke bërë bashkë poezinë dhe lexuesit.
Aty në lulishten bri Lasgush Poradecit e Mitrush Kutelit, Varg Festival organizuar nga Qendra Kombëtare e Librit dhe Leximit, nisi siparin e takimeve në qytetin e bukurisë së fjalës shqipe, Pogradecin, më 8 gusht.
Mbrëmjen e 8 gushtit ishte poetja Natasha Lako që erdhi pranë lexuesve të saj në një diskutim mbi vargun shqip, rrugëtimin e saj poetik, qytetin, kulturën, gruan dhe jetën.
Poetja Natasha Lako erdhi në një dialog të vecantë me poeten Mimoza Ahmeti, e cila edhe lexoi poezi të Lakos për dhjetëra turistë e lexues që u bashkuan.
Pas Lakos, Varg Festival vijoi edhe me dy poetë korcarë mbrëmjen e 9 gushtit, Skënder Rusi dhe Eris Rusi, të cilët erdhën pranë lexuesit nën logon “At e bir”.
Një tjetër poete do të ndajë detaje dhe përvojën e saj nga rrugëtimi artistik sonte në Pogradec. Nurie Emrullai është shkrimtarja dhe poetja e re nga Kërçova e Maqedonisë së Veriut, që mori këtë vit edhe Çmimin Letrar Kadare, e cila do të vijë pranë lexuesit në një rrëfim për dy vëllimet e saj me poezi “Vargmale nën dhe”, si dhe “Në orën moderne të perëndive” si dhe për të rrëfyer rrugëtimin e saj poetik.
Mbrëmjet poetike në Pogradec, por edhe në Durrës e Sarandë i ka shoqëruar edhe ekspozita me foto e shkrimtarëve shqiptarë, realizuar nga fotografi Roland Tasho.
Varg Festival nisi nga Durrësi në Torrën Veneciane më 18 korrik ku bëri bashkë poetë nga Shqipëria dhe Kosova për të ndarë eksperiencat e tyre në shkrim dhe qasjen ndaj poezisë bashkëkohore.
Ai synon të kthehet në një traditë gjatë stinës së verës për t’i bërë bashkë poetët me lexuesit e tyre në qytetet turistike.
Këto aktivitete janë një nga stacionet e sezonit veror “KultArt” 2023, organizuar nga Ministria e Kulturës, që çon artin e kulturën atje ku është publiku.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
