Gazeta Si – Kosova dhe Alen Zhires kanë ndarë rrugët. Një ditë pas humbjes me Bjellorusinë në eliminatoret e Europianit 2024, francezi është larguar nga detyra e trajnerit të ‘Dardanëve’.
Lajmi është bërë i ditur nga Federata e Futbollit të Kosovës nëpërmjet një postimi në faqen e saj zyrtare, ku shkruhet se është rënë dakord për ndërprerjen e bashkëpunimit.
“Federata e Futbollit e Kosovës njofton opinionin që me marrëveshje të dyanshme me përzgjedhësin Alen Zhires është vendosur për ndërprerjen e bashkëpunimit. Ky vendim, vjen pas humbjes në ndeshjen e fundit kundër Bjellorusisë (1:2).
Federata e falënderon trajnerin Zhires për angazhimin dhe punën e tij gjatë periudhës sa ishte në krye të Kosovës. Në të ardhmen priten reforma të mëtejshme në ekipin kombëtar”, – shkruhet në njoftimin e FFK-së, që tashmë duhet të gjejë një trajner të ri.
Trajneri francez ka ‘paguar’ rezultatet e dobëta në katër ndeshjet e deritanishme kualifikuese, ku nuk ka marrë asnjë fitore. Kosova ka vetëm 3 pikë dhe mban vendin e 5-të në grupin e saj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
