Gazeta Si – Një lajm i bujshëm vjen nga Franca në lidhje me sulmuesin Kilian Mbape. Sipas ‘Equipe’, ai i ka komunikuar klubit të PSG-së vendimin për të mos ushtruar opsionin e kontratës deri në vitin 2025.
Një kthesë e fortë kjo për klubin parisien. Gazeta prestigjioze franceze bën me dije se lojtari i ka dërguar një letër formale klubit, ku saktëson se në asnjë rast ai nuk dëshiron që të aktivizohet opsioni i zgjatjes së kontratës deri në 2025-ën, siç parashikohet në kontratën që i skadon më 30 qershor 2024.
Ky vendim i ka shtangur drejtuesit e PSG-së, që tashmë duket se janë detyruar të vlerësojnë shitjen e bomberit që në këtë sesion të merkatos, pa u futur në tratativa si herën e fundit. Për Kilian Mbape pritet një verë e nxehtë. Nëse vërtetohet lajmi i ‘Equipe’, sulmuesi do të ishte pjesa më e çmuar e merkatos së verës.
Pozicioni i lojtarit do ta vinte PSG-në me shpatulla pas murit, duke e detyruar të shohë ofertat muajt e ardhshëm për të evituar humbjen me parametra zero të xhevahirit të vet verën e ardhshme. Hipoteza e fundit nuk ishte marrë asnjëherë në konsideratë në Paris, por tani situata ndryshon.
🚨🚨 Florentino Pérez, presidente do Real Madrid, sobre contratar Mbappé:
— Portal Paris Saint-Germain • 🇧🇷 (@portalpsg) June 10, 2023
— “Florentino, você vai contratar Mbappé?”
Florentino: “Sim, Sim. Mas não neste ano.” pic.twitter.com/AMbxoy1ESJ
Interesimi konkret është ai i Real Madridit, pas fundit të erës Benzema. Së fundi presidenti madrilen Florentino Perez nuk ka bërë lojë fjalësh për pozicionin e ‘Blancos’ për francezin. “A do ta marr Mbape? Po, do ta bëjmë, por jo këtë vit”, – ka deklaruar ditët e fundit numri 1 i klubit spanjoll.
Perez kishte parasysh vitin 2025, por me zhvillimet e fundit blerja e sulmuesit mund të përshpejtohet. Pas lamtumirës së Lionel Mesit dhe presingut të Al Hilal për Nejmar, PSG po përgatitet të përshëndetet edhe me Kilian Mbape.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
