.png)
Gazeta Si - Kryeministri Edi Rama ka reaguar për akuzat e opozitës sa i përket çështjes së hetimit në SHBA ndaj ish-agjentit të FBI-së. Kryeministria shpërndau mbrëmjen e së enjtes një deklaratë, duke i e krahasuar me një shprehje popullore se u mbars mali dhe polli një mi.
"Ky mal i madh mbarsur me fantazi dhe ligësi do të pjellë edhe më pak se një mi. Fatmirësisht, gjithçka është e hetuar në SHBA dhe konkluzioni i hetimit s’ka asnjë lidhje me mua a me qeverinë shqiptare. Paratë e marra prej rusëve nga PD nuk janë shpikje, por fakt po ashtu i hetuar dhe i provuar botërisht", - reagon Kryeministri.
Më tej ai i drejtohet opozitës se "deri dje thoshin Edi Rama dhe Sorosi, sot thonë Edi Rama dhe zyrtari i lartë i FBI, por si njëra si tjetra bien përtokë përballë fakteve të hetuara. Në këtë çështje zyrtari i lartë i FBI nuk akuzohet fare për asgjë nga këto që fliten me ulërima në Shqipëri, po vetëm për konflikt interesi në marrjen e borxhit nga miku i vet shqiptaro-amerikan dhe mosdeklarim të tij".
"Edhe më qesharake janë akuzat për përfshirjen e oligarkut rus në biznes në Shqipëri, si pjesë e këtij konspiracioni agjenturor të tipit kinematografik “Fije që priten”. Kompania Strabag është flamuri më i madh i ekonomisë austriake, e cila ashtu si edhe kompania Trema operojnë në Shqipëri prej dekadash.
Të lidhësh një aksioner rus të këtyre kompanive (i cili së fundmi është përjashtuar prej tyre si një individ nën sanksionet e luftës) me këtë përrallë që edhe pa të është krejt groteske, do të thotë të jesh në dëshpërim total", - thuhet më tej në deklaratë.
Për qeverinë shqiptare sulmet e opozitës lidhen me ngjarjet e tjera si Gërdeci apo 21 janari. "Dihet që njerëz të dëshpëruar bëjnë gjëra të dëshpëruara dhe kjo histori është pasqyrë besnike e dëshpërimit të opozitës sonë, e cila përveçse s’ka kokë, ka mbi kurriz çështje madhore si Gërdeci, 21 janari apo edhe lidhjet ruse qysh në kohën kur bashkoi votën me partinë e Putinit në Këshillin e Europës kundër Ushtrisë Çlirimtare të Kosovës.
Të gjitha këto janë fakte që kërkojnë drejtësi, jo teori konspiracioni dhe s’ka teori konspiracioni që i varros dot në harresë", - thuhet në deklaratë. Ky qëndrim vjen pas kërkesës së opozitës dhe kryesisht nga ish-kryeministri Sali Berisha për dorëheqjen e Ramës në lidhje me këtë hetim të nisur në SHBA ndaj ish-agjentit të FBI-së.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
