.png)
Gazeta Si - Një bisedë e përgjuar mes Rozeta Dobit dhe Havier Dobit në ambientet e paraburgimit të drejtorisë së Policisë në Tiranë, ka zbuluar shumën e dytë të gjetur prej 400 mijë eurosh në banesën e tyre.
Gjatë përgjimit në qeli, mësohet nënë e bir janë shprehur se nuk e kanë gjetur “shumën e madhe”, por vetëm 120 mijë euro. Nga ky audiopërgjim policia ka arritur të gjejë paratë e fshehura në tubin e aspirimit.
Pikërisht prej këtyre indicieve, policia dhe Prokuroria e Tiranës kanë nisur hetimet për të gjetur origjinën e parave të vjedhura në shtëpinë e zyrtares Alda Klosi.
Në rast se këto para rezultojnë të padeklaruara, atëherë do të ngrihet akuzë ndaj ish-shefes së kabinetit të Arben Ahmetajt.
Sa i përket hetimeve nga të dyja palët, po hetohet për shumën e dytë të parave, mbi 400 mijë euro të cilat u gjetën në tubin e aspirimit në banesën e nënë e bir.
Se ku janë vjedhur nuk është përcaktuar ende, megjithëse dyshimet janë se janë marrë në të njëjtën banesë te rruga e “Kosovarëve”.
Të shtunën e 7 janarit policia njoftoi arrestimin e Rozeta dhe Havier Dobit për vjedhjen e 120 mijë eurove në shtëpinë ku gruaja ishte punonjëse e mirëmbajtjes.
Pas kontrolleve të mëtejshme në banesën e tyre u gjetën dhe para të tjera në tubin e aspirimit.
Mësohet se pronarja e shtëpisë Alda Klosi ka qenë jashtë vendit dhe para se të largohej i ka dorëzuar një kopje të çelësit pastrueses, e cila më pas bashkë me djalin e saj ka ndërhyrë në kasafortë.
Sakaq, policia e Tiranës ka dyshime se Rozeta dhe Havier Dobi, janë të përfshirë në të paktën 4 grabitje të tjera.
Nga burime paraprake, mësohet se policia po kontakton të gjithë pronarët e banesave ku punonte Dobi, me qëllim marrjen e informacioneve për shumat e mundshme që mund të jenë vjedhur në banesat e tyre.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
