.png)
Nga Gazeta ‘SI’- Komisioni Europian ka ripërsëritur për Shqipërinë, pasojat që ajo do të ketë nëse vazhdon më tej me implementimin e skemës së pasaportave të arta. KE thekson se nëse kjo miratohet, Shqipërisë mund t’i pezullohet regjimi pa viza për në BE.
Në raportin e Pestë të rekomandimeve, KE rikujton se një skemë e shtetësisë së investitorëve do të ishte në kundërshtim me rekomandimet e bëra në Raportin e Katërt e që cënon sigurinë dhe politikën publike të shteteve anëtare.
“Një skemë e nënshtetësisë së investitorit mund të përdoret për të anashkaluar procedurën e vizave me qëndrim të shkurtër të BE-së dhe vlerësimin e thellë të rreziqeve individuale të migracionit dhe të sigurisë që kjo procedurë sjell, duke përfshirë një shmangie të mundshme të masave për të parandaluar pastrimin e parave dhe financimin e terrorizmit. Ky është një shqetësim i madh për BE-në në kuadrin e marrëveshjes së saj pa viza me Shqipërinë”,-shkruhet në raportin e sapo publikuar.
Një tjetër rekomandim i përsëritur nga KE për Shqipërinë, ku ka pasur përkeqësimë është ai i vizave për vendet që BE i vlerëson me rrezik për Europën dhe emigracionin e paligjshëm. Si p.sh për Bahrein, Oman, Katar, Rusi, Arabi Saudite, Tajlandë etj.
KE i kërkon Shqipërisë të vijojë me bashkëpunimin me shtetet anëtare më të prekura nga kërkesat për azil nga shtetasit shqiptarë.
“Të vazhdojë forcimin e parandalimit dhe luftës kundër korrupsionit, krimit të organizuar, trafikimit të paligjshëm, terrorizmit dhe pastrimit të parave duke: (i) rritur pjesëmarrjen e Shqipërisë në EMPACT; (ii) përparimin e mëtejshëm drejt ndërtimit të një historie solide të rasteve të korrupsionit dhe krimit të organizuar, si dhe sekuestrimin, konfiskimin dhe rikuperimin e aseteve kriminale që rezultojnë nga vepra të tilla; (iii) adresimin e të gjitha pikave të mbetura në planin e veprimit të Task Forcës së Veprimit Financiar. Të bëjë përparim të mëtejshëm në zbatimin e marrëveshjes dypalëshe në kuadër të Planit të Përbashkët të Veprimit për Kundër-Terrorizmin për Ballkanin Perëndimor” thuhet në raportin e KE.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
