.png)
Bashkimi Europian po i afrohet propozimit të një rregullimi të përkohshëm të tregut të energjisë elektrike duke kufizuar çmimet e gazit edhe pse presioni rritet për bllokun për të vendosur një kufi më të gjerë.
Ministrat e Energjisë së BE-së të mbledhur në Pragë sot(12 tetor) do të marrin në konsideratë atë model, i cili tashmë është miratuar nga Spanja dhe Portugalia, duke i lejuar konsumatorët të shmangin rritjen më të keqe të çmimeve. Megjithatë, disa vende, përfshirë Gjermaninë, mbeten skeptike, nga frika se një kufi mund të nxisë kërkesën në një kohë kur BE-ja duhet të frenojë etjen e saj për gazin rus.
Gjermania dhe Holanda planifikojnë të thonë se çdo masë e tillë do të duhet të konsiderohet “me shumë kujdes” dhe të sigurojë që barra të ndahet midis vendeve.
Ata favorizojnë blerjet e menjëhershme të përbashkëta të gazit nga BE për të ndaluar vendet të konkurrojnë me njëri-tjetrin, si dhe objektiva më të ashpra për uljen e kërkesës.
“Për sa i përket shkëputjes, mendoj se me siguri ka një marrëveshje të përgjithësuar dhe komisioni po ecën në këtë drejtim,” u tha gazetarëve Roberto Cingolani, ministri i Italisë për tranzicionin ekologjik, duke iu referuar Komisionit Europian. “Për sa i përket kufizimit të çmimit të gazit, të gjithë pajtohen se çmimet janë të çmendura. Kjo mund të varet nga inxhinieria e tregut, por sigurisht që ka zgjidhje të ndryshme të mundshme.”
Ai shtoi: “Ne jemi dakord për diagnozën, terapia është ende në diskutim.”
Me afrimin e dimrit, koha po mbaron për të pajtuar këto dallime. Komisioneri i Energjisë, Kadri Simson do të paraqesë një udhërrëfyes më të detajuar për ministrat në kryeqytetin çek të mërkurën.
Plani mund të përfshijë propozime të mundshme për një shkëputje të tregut të energjisë elektrike, si dhe masa për prokurimin e gazit që do të diskutohen më pas nga krerët e BE në një samit në 20-21 tetor.
“Ka një garë afatshkurtër për të krijuar konsensus më të madh,” tha Maximo Miccinilli, kreu i energjisë dhe klimës në firmën konsulente FleishmanHillard EU. “Ata mund të bien dakord për parimin e shkëputjes së gazit nga energjia elektrike, por atyre u duhet kohë për të kuptuar se si ta bëjnë këtë.”
Qëllimi është që ministrat e energjisë të mblidhen sërish në një takim urgjent muajin e ardhshëm për të nënshkruar masat e nevojshme për të mbrojtur qytetarët kundër krizës së paprecedentë të energjisë. Blloku ka vendosur tashmë taksa të papritura mbi fitimet e kompanive të energjisë dhe ka rënë dakord për qëllimet e reduktimit të kërkesës për energji dhe gaz.
Ndërsa blloku shkon drejt një kufiri të çmimit të gazit në prodhimin e energjisë elektrike, marrëveshja për një kufi më të gjerë do të zgjasë më shumë për shkak të kompleksitetit të tij, sipas një zyrtari të lartë të BE-së me njohuri për këtë çështje. Sfida kryesore është të sigurohet që çdo tavan të jetë mjaft i ulët për të ulur çmimet për konsumatorët dhe bizneset, por mjaftueshëm i lartë për të tërhequr ende furnizimet me gaz në tregun global.
Në të njëjtën kohë, Gjermania është vënë në qendër të vëmendjes për paketën e saj prej 200 miliardë eurosh për të ndihmuar në zbutjen e goditjes së krizës energjetike, duke ngritur shqetësimin se vendet do të përpiqen të konkurrojnë më tej në masat e ndihmës, në vend që të marrin një përgjigje të unifikuar.
Burimi: Bloomberg/Përshtati Gazeta Si
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
