.png)
Gazeta Si – Një konflikt i vazhdueshëm për pronën, por edhe ardhja e një fletë-thirrjeje nga gjykata, duket se janë bërë shkak për ngjarjen e rëndë në zonën e “Myslim Shyrit”, ku Arsen Muskurti vrau vëllanë dhe kunatën, Alban dhe Nora Muskurti me armë zjarri.
Ngjarja ka ndodhur pas konflikteve të vazhdueshme, për të cilat viktimat kishin kërkuar urdhër-mbrojtje nga autori në gjykatë.
Muskurti kishte kërkuar urdhër-mbrojtje nga vëllai dhe duket se kjo ka bërë që 38-vjeçari të humbë arsyen e të ndërmarrë aktin ekstrem.
Aktin e kishte paralajmëruar që më parë në “Facebook” dhe pasi u pajis me një armë pa leje, shkoi në vendin e tyre të punës dhe i vrau. Dy orë pas ngjarjes, ai u arrestua në rrugën “5 Maji” në Tiranë.
Gjatë marrjes në pyetje i arrestuari ka qenë nervoz teksa ka shpjeguar edhe konfliket qe kishte më të vëllanë dhe kunatën e tij të cilët sipas tij e bullizonin.
Ai nuk ka shfaqur asnjë pendesë dhe ka thënë se vëllai dhe kunata e kishin e zili për punën, si dhe ka treguar edhe që ka patur konflikte për menaxhimin e bizneseve dhe pronave.
Por edhe pretendimi për agjencinë turistike dyshohet të jetë edhe shkak i kësaj vrasjeje. Dy vëllezërit kanë qenë ortakë në biznes, por më pas ishin ndarë, duke shkuar deri në konflikte të vazhdueshme.
Para pak kohësh ata janë zënë edhe për vendin e një parkimi para biznesit të tyre kur punonin bashkë, ndërsa autori kishte edhe një dyqan në rrugën “5 Maji” me produkte kozmetike bimore.
Mirëpo ky nuk ishte konflikti i vetëm, pasi autori me anë të statuseve në rrjetet sociale, i akuzonte 2 viktimat se kishin krijuar profile false për të sharë hoxhallarët, gjë që për autorin ishte e papranueshme.
Ai ishte predikues i fesë islame, teksa për arrestimin e tij shkoi edhe RENEA për shkak se kishte dyshime që ishte radikal dhe përbënte rrezikshmëri për persona të tjerë.
Pas arrestimit, Arsen (Hamza) Muskurti u ka treguar hetuesve edhe rrugën se ku e kishte hedhur armën pistoletë me të cilën vrau vëllain dhe kunatën.
Arma është gjetur nga policia dhe është sekuestruar.
Ngjarja ndodhi pasditen e të martës rreth orës 16:40, në një prej zonave më të frekuentuara në kryeqytet, ndërsa autori nuk ishte një person i panjohur.
Dyshja konfliktoheshin çdo ditë, edhe për parkimin e makinave, ndërsa jetonin me shtëpi në zonën e Alliasit.
Dy bashkëshortët dhe familjari i tyre kishin pasur debate prej kohësh, të cilat u përshkallëzuan deri në krimin e sotëm. Përplasjen më të fundit e kishin pasur para dy ditësh.
Duket se kjo ngjarje e kishte fundin e pritur, pasi ka dhe denoncime nga vëllezërit kundër njëri-tjetrit.
Arsen (Hamza) Muskurti ka bërë një postimi në 13 gusht lidhur me dy viktimat, ku shkruan se ata dërgojnë njerëz në Umra (peligrinazh në Meka) dhe se merren me mashtrime e shpifje.
Ai flet me një gjuhë urrejtje për ta në postime, duke u thënë që ata duhet të kenë turp për veprimet e tyre.
Nga fjalët e ashpra të përdorura në mesazhet e tij, vrasja e dyfishtë duket një krim i paralajmëruar.
Të dy vëllezërit Muskurti kishin nga dy emra, autori Arsen dhe Hamza, ndërsa Dritani mbante dhe emrin Alban.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
