.png)
Gazeta Si - Skandali i trafikut të klandestinëve me gomone nga Franca në Angli që drejtohet nga kontrabandistë shqiptarë, është kthyer në temën e ditës për mediat britanike.
Një gazetar i të përditshmes "The Sun" është infiltruar brenda linjës së trafikut me gomone që përshkon kanalin e La Manshit.
Trafikanti, që thuhet se është shqiptar, siguron për kalimin nga Franca në Britani për një pagesë 4.500 paund.
Grupi kriminal që transporton personat drejt Britanisë, përdor rrjetin “Tik Tok” për të reklamuar trafikun e njerëzve drejt Anglisë.
Në platformë ka oferta të shumta, nga një person deri dhe në transportin e familjeve, duke u kthyer në një “agjenci turistike” në këtë muaj të gushtit.
Gjatë investigimit të gazetarit, shqiptarët mburren se si francezët do t’i lejojnë emigrantët të kalojnë.
“Ne zbuluam llogari të shumta nga shqiptarët që sigurojnë kalim të sigurt me varkë të vogël apo edhe jahte luksoze, ndërsa përfshihet këshillim se si të kërkojnë azil. Duke i ofruar gazetarit një vend prej 4500 £ në një gomone, njëri prej tyre u mburr: ‘Francezët nuk do t’ju ndalojnë. Përkundrazi, ata do t’ju shoqërojnë të sigurt derisa të arrini në kufirin ujor të Mbretërisë së Bashkuar’”, shkruan “The Sun”.
Gazetari britanik u prezantua si emigrant shqiptar, të cilit iu tha të kontaktonte një avokat pas mbërritjes në Britani.
Ai shtoi në bisedën “Tik Tok”: “Mund t’ju jap një numër avokatësh që kam përdorur për të afërmit e mi. Ata kanë arritur të sigurojnë dokumentacion (leje qëndrimi) për gjysmën e shqiptarëve në Londër”.
I pyetur për fatin e të ardhurve së fundmit, ai tha: “Tre muaj më parë një djalë u mbajt në paraburgim për një muaj, pastaj u lirua nga avokati i tij. Të gjithë të tjerët, me të cilët kam biseduar pasi mbërritën, u dërguan në hotele, më pas u zhdukën. Ata shkuan te të afërmit e tyre”.
Trafikanti, pseudonimi në “Tik Tok” i të cilit është @franc_gomone_angli1 — po fiton para nga shqiptarë që shkojnë në Britani.
Në vitin 2021, gjithsej 757 shqiptarë kaluan Kanalin me anije të vogla. Në vetëm gjashtë javë këtë verë kaluan 1,075 shqiptarë, gati 40 për qind e të gjithë atyre që arritën në Britani në këtë mënyrë, thotë një raport sipas ‘The Sun”.
Gazetari pyet trafikantin shqiptar, se çfarë duhet të bëjë një person kur kërkon azil, trafikanti shtoi: “Duhet të gjesh një avokat kur të arrish në hotel. Do të keni mjaft kohë për të menduar për historinë tuaj dhe për të gjetur një avokat. Do të duhen shumë muaj për të bërë intervistën e parë, sepse ka shumë njerëz”.
Vitin e kaluar, Sekretarja e Brendshme e Britanisë, Priti Pattel nënshkroi një marrëveshje me Shqipërinë për të kthyer shtetasit e saj nëse nuk kishin të drejtë të qëndronin. Pothuajse 1000 janë larguar deri më tani.
“Postimet në mediat sociale që promovojnë kalime të paligjshme janë krejtësisht të papranueshme. Ne po shikojmë të reformojmë sistemin që përdoret për të identifikuar viktimat e skllavërisë moderne, në mënyrë që të mund të mbështesim viktimat e vërteta duke u siguruar që sistemi të mos keqpërdoret”, tha Patel për hetimin e “The Sun”.
Ndërkohë që Shqipëria, një vend anëtar i NATO-s, i goditur nga varfëria, nuk është në luftë prej 25 vitesh.
Ish-udhëheqësi i konservatorëve, Iain Duncan Smith tha se fluksi dëshmoi se njerëzit po vinin jo për të ikur nga lufta, por "me një biletë migrimi ekonomik" dhe po abuzonin me sistemin e azilit.
Dhe ish-shefi i Forcave Kufitare Tony Smith këmbënguli se kishte prova që shqiptarët këshilloheshin nga kontrabandistët të pretendonin se ishin viktima të trafikimit dhe jo azilkërkues, duke e bërë përpjekjen e tyre për të qëndruar më shumë gjasa për të pasur sukses.
Ai tha: "Është një tjetër pengesë për heqjen që do të thotë se ata nuk mund të kthehen menjëherë në Shqipëri."
Duke u shtirur si një emigrant që kërkon një udhëtim me gomone për në Britani, gazetari britanik kontaktoi tre faqe “Tik Tok”-u që reklamonin kalimet e paligjshme.
Një kontrabandist - i cili e quajti veten Gent dhe pretendonte se ishte një "zot" i biznesit të kontrabandës së njerëzve - ofroi një shërbim "më të sigurt" të jahteve luksoze në Mbretërinë e Bashkuar me 15,000 £ për person.
I kontaktuar nëpërmjet faqes Shqipëri-Angli, për kalime me varka të vogla, ai tha: “Shqiptarët të mos e vendosin veten në rrezik. Ne kemi një udhëtim me jaht me dhoma çdo fundjavë”.
Një tjetër kontrabandist - i cili tha se jetonte në Birmingham - shpalli çmime të ulëta të vendeve në një gomone me 8,000 £ për dy persona, në një mjet që ai tha se do të ishte i mbushur me deri në 40 persona të tjerë.
Llogaria @ franc_gomone_angli1, ka 1,819 ndjekës të TikTok dhe 6,937 pëlqime.
Ajo promovon biznesin e saj me një sërë videosh që tregojnë emigrantë të ngjeshur në gomone. Njëri kishte mbishkrimin: "Udhëtim sonte nga Calais dhe Dunkirk".
Në një tjetër, që tregon emigrantët në një gomone, lexohet: “Suksesi flet vetë. Djemtë mbërritën mirë në Londër sonte."
Gazetari e pyeti kontrabandistin në bisedën në “Tik Tok” nëse përpjekja e qeverisë britanike për të dëbuar emigrantët në Ruandë, në Afrikën Qendrore, do të përbënte një problem.
Shqiptari iu përgjigj: “Jo, jo, mos u shqetëso. Nuk të dërgojnë atje. Kjo është anuluar. Ata do t'ju dërgojnë në një hotel. Pastaj prej andej ke mundësinë të shkosh sa herë të duash”.
Burimi: "The Sun"; Përshtati në shqip: Gazeta "Si"
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
