Kreu i Organizatës Botërore të Shëndetësisë (OBSH), Tedros Ghebreyesus, ka deklaruar se rritja e rasteve dhe vdekjeve nga Covid-19, është shqetësuese. Kjo sipas OBSH do ushtrojë presion ndaj sistemeve shëndetësore, derisa lija e majmunëve gjithashtu po rritet me 9.300 raste të raportuara në 63 vende.
“Jam i shqetësuar për trendin në rritje të vdekjeve nga COVID-19, duke ushtruar presion të mëtejshëm mbi sistemet shëndetësore dhe punonjësit shëndetësor. Komiteti i Emergjencës për COVID-19 u takua të premten e javës së kaluar dhe arriti në përfundim se virusi mbetet një emergjencë e shëndetit publik me shqetësim ndërkombëtar”, tha Tedros.
Kreu i OBSH tha se komiteti theksoi shqetësimin e tij se nën-llojet e virusit omicron, si BA.4 dhe BA.5, vazhdojnë të shkaktojnë shtrime në spital dhe vdekje në mbarë botën.
“Mbikëqyrja është reduktuar ndjeshëm, duke përfshirë testimin dhe duke e bërë gjithnjë e më të vështirë vlerësimin e ndikimit të llojeve në transmetimin, karakteristikat e sëmundjes dhe efektivitetin e kundërmasave”, tha ai.
Përveç kësaj, shtoi ai, diagnostifikimi, trajtimi dhe vaksinat nuk janë shpërndarë në mënyrë efektive.
Globalisht, rastet e reja javore të OBSH-së u rritën për të katërtën javë radhazi, pas rënies që nga kulmi i fundit në muajin mars.
Tedros tha më tej se Komiteti i Emergjencës për linë e majmunëve do të mblidhet përsëri javën e ardhshme dhe do të shikojë tendencat sa efektive janë kundërmasat.
“OBSH po punon ngushtë me shoqërinë civile dhe komunitetin LGBTIQ+, veçanërisht për të trajtuar stigmën rreth virusit dhe përhapjen e informacionit në mënyrë që njerëzit të qëndrojnë të sigurt”, përfundoi Tedros.
Burimi:Anadolu Agency
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
