.png)
Nga Gazeta “Si” – Segmenti rrugor Kardhiq-Delvinë do të hapet përfundimisht me datë 2 korrik pas punimeve disavjeçare, sipas njoftimeve zyrtare nga Ministria e Infrastrukturës dhe kryeministria.
Aksi ka një gjatësi prej 33 kilometrash përshkon rrethin e Gjirokastrës, Delvinës dhe Sarandës. E përbërë nga 6 lote, kjo rrugë është cilësuar si ndër projektet më të rëndësishme, pasi është projektuar të shkurtojë me 1 orë rrugën e udhëtimit Tiranë-Sarandë dhe shkurton po aq distancën midis Sarandës e Gjirokastrës. Ky projekt eleminon kalimin e automjeteve në Qafën e Muzinës. Kjo pikë ka qenë shpeshherë burim aksidentesh për mjetet që qarkullojnë, duke lënë edhe viktima, sidomos gjatë sezonit veror.
Hapi i fundit i këtij projekti është tuneli i Skërficës dhe segmenti Shijan-Ura e Gajdarit, për të cilat më 5 qershor 2022, ministrja e Infrastrukturës Belinda Balluku tha se janë pothuajse në përfundim. Balluku shtoi se kjo punë që do të përfundonte sipas kontratës në vjeshtën e vitit 2022, por do të përmbyllet disa muaj përpara afatit për t’i dhënë kështu “një frymëmarrje Jugut të vendit”.
Aktualisht aty po betonohen metrat e fundit të tunelit, ndërsa paralelisht po vijon puna edhe për sistemin e ndriçimit dhe atë elektro-mekanik.
Ndërkohë, pak orë më parë edhe kryeministri i vendit, Edi Rama ka publikuar një video që tregon të gjithë rrugën e punuar duke përcaktuar se këto janë pamjet “thuajse finale, fare pak ditë para se të hapet”.
Më herët ai ka shkruar se ky është një nga projektet e paketës transformuese për ekonominë dhe turizmin e gjithë zonës.
Video e Ramës:
Tuneli i aksit Kardhiq-Delvinë është hartuar që në vitin 2008, por herëpashere ka pasur ndërprerje apo ndryshim të kontratave të ndërtimit dhe ka qenë gjithmonë projekt i cilësuar si ndër më të rëndësishmit. Përfundimi i këtij projekti do të mundësojë aksesin më të lehtë, të sigurtë dhe të shpejtë të udhëtarëve drejt Sarandës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
