BE ka ngrirë 35 miliardë euro në asete për shkak të pushtimit të Rusisë

Vendet e Bashkimit Europian ngrinë 35 miliardë euro (51.7 miliardë dollarë) asete në përgjigje të pushtimit rus të Ukrainës gjatë 5 javëve të para të luftës, me Francën që kryeson listën, me mallra dhe kapital të ngrirë me vlerë 23.5 miliardë euro.

Gjermania, ekonomia më e madhe e BE-së, pasoi Francën, duke sekuestruar asete me vlerë 341.600 euro, sipas një vlerësimi të Komisionit Europian.

Javën pas këtij vlerësimi, Berlini sekuestroi superjahtin Dilbar të miliarderit rus Alisher Usmanov, i cili vlerësohej nga 600 deri në 750 milionë dollarë.

Pjesa më e madhe e alokimit francez — 22.8 miliardë euro — përfshinte fondet e bankës qendrore ruse. Në ditët pas pushtimit të Rusisë më 24 shkurt, BE-ja ndaloi të gjitha transaksionet me bankën qendrore në një përpjekje për të izoluar ekonominë dhe sistemin financiar të Moskës. Rusia ka rreth 640 miliardë dollarë rezerva.

Vendimi për të goditur bankën qendrore ishte i pari për një ekonomi me madhësinë e Rusisë dhe ishte një përpjekje për t’i lënë Moskës uri nga paratë e gatshme dhe për t’i privuar politikëbërësit monetarë nga valuta e fortë e nevojshme për të mbështetur rublën në tregun e këmbimit valutor. Ajo u pa gjithashtu si një mënyrë për të kufizuar potencialisht aftësinë e Rusisë për të financuar luftën e saj.

Një zëdhënës i komisionit, krahu ekzekutiv i BE-së, nuk pranoi të komentojë mbi dokumentin.

Belgjika kishte ngrirje të aseteve me vlerë 10 miliardë euro, që përfshin ndikimin e shkëputjes së 7 bankave ruse nga sistemi i pagesave ndërkombëtare Swift si VTB Bank dhe Bank Rossiya, sipas një zyrtari që kërkoi të mos identifikohej sepse informacioni është konfidencial.

Totali i Italisë ishte 1.1 miliardë euro, me asete të ngrira, duke përfshirë jahte dhe pasuri të paluajtshme në Sardenjë dhe Toskanë. Irlanda llogaritet për ngrirjen e aseteve me vlerë 839 milionë euro, Holanda për 516 milionë euro dhe Danimarka për 4.195 euro.

Numrat për disa shtete anëtare nuk ishin të disponueshme, përfshirë për Spanjën dhe Hungarinë.

Burimi: Bloomberg/Përshtati Gazeta Si

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.