.png)
Kompania ajrore “Israir”, që ofronte lidhje direkte me Shqipërinë nga Izraeli, ka anuluar fluturimet, duke i zëvendësuar me Serbinë dhe Malin e Zi, për shkak të subvencioneve që ata po japin.
Lajmi është bërë i ditur në rrjetet sociale nga Unionit Turistik Shqiptar duke e konsideruar këtë vendim si një humbje të madhe për turizmin shqiptar pas izraelitët e vizitonin vendin tonë përgjatë gjithë vitit edhe në ture kulturore.
“Kompania ajrore Israir, duke filluar nga 25 prilli ka anuluar të gjitha fluturimet me Shqipërinë dhe në vend të saj do të fluturojë dy herë në ditë në Mal të Zi dhe ne Beograd, pasi këto shtete i dhanë 50 euro subvencion për çdo turist. Kjo do të thotë që tregut turistik të Malit te Zi do t’i shtohen këtë vit rreth 50 mijë turistë më shumë, të cilët fare mirë mund t’i kishte marrë vendi ynë, nëse Qeveria jonë do të merrte në konsideratë kërkesat e kahershme të Unionit Turistik për politika incentivuese. Këto vende, përfshirë dhe Maqedoninë e Veriut janë në tratativa dhe me disa Tour Operatore të njohur ndërkombëtarë të cilët aktualisht operojnë në Shqipëri, që t’i largojnë nga Shqipëria dhe t’i tërheqin drejt vendeve të tyre”.
“Dhe e dini pse ndodh kjo?! Sepse shteti atje mendon për mireqenien e qytetarëve të vet dhe nuk bën shoë siç bëjnë tek Ne”, thuhet në reagimin e Unionit në Facebook.
Kompania kishte fluturime të rregullta me Shqipërinë 5 herë në javë, për një turizëm të organizuar që shtrihej në të gjithë Shqipërinë po kryesisht në Durrës.
Tashmë në mungesë të kompanisë që ofron shërbimin e charterit , operatorët po përballen me anulimin e rezervimeve që një pjesë ishin kontrata me garanci dhe një pjesë allotment (paguaj sa plotëson).
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
