Shqiptarët përdorën 42 mln gigabyte gjatë tremujorit të fundit të vitit 2021, me 57% rritje më shumë nga e njëjta periudhe e 2020-s.
Mesatarisht çdo përdorues shpenzoi 6.8 GB internet në muaj. Sipas AKEP, në fund të vitit të kaluar u raportuan 2.06 milionë përdorues të internetit me brez të gjerë nga rrjetet celulare, në rritje me 2.9% krahasuar me fundin e vitin 2020.
Ndërkohë, volumi i thirrjeve telefonike drejtëpërdrejtë në rrjetet celulare ra me 3.4% dhe numri i mesazheve SMS me 8.5%, nga tremujori i fundit i 2020-s.
Sipas Autoritetit të Komunikimeve Elektronike, 2022-shi pritet të hapë frekuencat e 5G-së për vendin tonë, me një shpejtësi 10 herë më të lartë se 4G.
Sipas Planit Kombëtar të Frekuencave, që u miratua në mars të vitit të kaluar, brezi 694-790 MHz, do të kalojë përfundimisht nën administrimin e AKEP duke filluar nga 30 qershori 2022 dhe jo nga kompanitë.
Po këtë vit, do të ulen dhe agjencitë e telekomunikacionit që operojnë në Shqipëri, pas blerjes së Albtelecom dhe One nga një kompani hunagreze.
Një nga arsyet që Autoriteti i Konkurrencës i hapi rrugën këtij transaksioni ishte vështirësia e ALBtelecom për të mbijetuar në tregun celular, mbështetur në performancën e vazhdueshme negative financiare, që nga fillimi i aktivitetit të saj në këtë treg. Pritet se bashkimi dhe krijimi i një operatori më të madh mund të rrisë eficiencën e operatorëve dhe të shtojë kapacitetet investuese, sidomos në optikën e kalimit të afërt në teknologjinë e re 5G
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
