.png)
Gjigantët e pagesave Visa dhe Mastercard kanë njoftuar se kanë pezulluar punën në Rusi, për shkak të pushtimit të Ukrainës.
Visa tha në një deklaratë se do të ndërpresë transaksionet “gjatë ditëve në vijim” dhe si rrjedhojë kartelat e lëshuara në Rusi nuk do të funksionojnë jashtë vendit, si dhe kartelat e huaja të lëshuara në Rusi.
Alfred Kelly, kryetar dhe shef ekzekutiv i kompanisë së pagesave digjitale me bazë në SHBA, tha se janë të detyruar të veprojnë këtë mënyrë, pas pushtimit të paprovokuar të Ukrainës nga Rusia.
“Na vjen keq për ndikimin që kjo do të ketë te kolegët tanë të çmuar dhe te klientët, partnerët, tregtarët dhe mbajtësit e kartave që u shërbejmë në Rusi. Kjo luftë dhe kërcënimi i vazhdueshëm ndaj paqes dhe stabilitetit kërkon që ne të përgjigjemi në përputhje me vlerat tona”, tha ai.
Po ashtu edhe Mastercard lëshoi një njoftim të ngjashëm, duke deklaruar se kartat e lëshuara nga bankat ruse nuk do të mbështeten më nga rrjeti i saj.
Kompania me bazë në SHBA shtoi se çdo kartelë Mastercard e lëshuar jashtë vendit nuk do të funksionon në Rusi.
“Për më shumë se një javë, bota ka parë ngjarjet tronditëse dhe shkatërruese që rezultuan nga pushtimi rus i Ukrainës. Kolegët tanë, klientët tanë dhe partnerët tanë janë prekur në forma të ndryshme, që shumica prej nesh nuk mund ta imagjinonin”, thuhet në njoftim.
Qeveria ukrainase u kishte bërë thirrje parë kompanive financiare që të pezullonin funksionimin e tyre në Rusi.
Mes shqetësimeve se kompanitë mund të përballen me veprime hakmarrëse nga hakerat rusë pas veprimit të tyre, Mastercard tha se do të mbetet vigjilente për të garantuar sigurinë dhe sigurinë e ekosistemit global të pagesave dhe rrjetit të tij.
“Ekipet tona kibernetike dhe të inteligjencës do të vazhdojnë të punojnë me qeveritë dhe partnerët anembanë botës për të siguruar që stabiliteti, integriteti dhe elasticiteti i sistemeve tona të vazhdojnë të udhëheqin operacionet dhe reagimin tonë ndaj sulmeve të mundshme kibernetike,” tha kompania.
Më herët të shtunën(5 mars), PayPal njoftoi se do të mbyllte të gjitha shërbimet e saj në Rusi.
“Në rrethanat aktuale, ne po pezullojmë shërbimet e PayPal në Rusi”, tha shefi ekzekutiv Dan Schulman. “PayPal mbështet popullin ukrainas dhe qëndron me komunitetin ndërkombëtar në dënimin e agresionit të dhunshëm ushtarak të Rusisë në Ukrainë.”
Burimi: Financial Times;Përshtati Gazeta “Si“
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
