.png)
Bota e kinemasë dhe platformat e transmetimit e kanë pezulluar Rusinë pas pushtimit të Ukrainës. E para që doli kundër ishte Disney, e cila, siç thuhet në deklaratën zyrtare, ka pezulluar të gjitha shfaqjet e kinemasë të planifikuara në Rusi, përfshirë atë të “Turning Red”, një film i animuar nga Pixar, i vendosur për 10 marsin që vjen. I njëjti fat edhe për filmin e shumëpritur “The Batman”, i cili do të mbërrinte në kinematë ruse më 3 mars, por shpërndarja e të cilit u ndalua nga Warner Bros. “Në dritën e krizës humanitare në Ukrainë, WarnerMedia ka pezulluar shfaqjen e filmit “The Batman” në Rusi, shkruan Hollywood Reporter. – Ne do të vazhdojmë të monitorojmë situatën në zhvillim dhe shpresojmë për një zgjidhje të shpejtë dhe paqësore të kësaj tragjedie”.
Mobilizimi anti-Putin ka përfshirë edhe Sony, i cili ka shtyrë të gjithë filmat e planifikuar në Rusi, duke përfshirë filmin “Morbius” të Marvelit me Jared Leto. “Duke pasur parasysh veprimet e vazhdueshme ushtarake në Ukrainë, pasigurinë që rezulton dhe krizën humanitare që po ndodh në atë rajon, ne do të pezullojmë shfaqjet tona kinematografike të planifikuara në Rusi, duke përfshirë daljen e afërt të “Morbius”, – shpjegoi një zëdhënës i Sony. – Mendimet dhe lutjet tona janë me të gjithë ata që janë prekur dhe shpresojmë që kjo krizë të zgjidhet shpejt”.
Siç u përmend, edhe platformat e transmetimit kanë vendosur të mbyllin urat me Rusinë: Netflix në fakt ka njoftuar se nuk do të shtojë kanale ruse në shërbimin e tij, siç do të parashikonte një ligj i miratuar në dhjetor nga qeveria Putin, ndërsa Roku ka vendosur të heqë kanalin RT – rrjetin televiziv rus të kontrolluar nga shteti – nga paketa e tij europiane.
Marrë nga Corriere della Sera, përshtati në shqip Gazeta Si
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
