.png)
Kompanitë Pfizer dhe BioNTech njoftuan më 25 janar se kanë nisur provat klinike për të testuar një version të ri të vaksinës së tyre, që është veçanërisht e dizajnuar për variantin Omicron të koronavirusit. Kjo pasi varianti Omicron duket se shmang mbrojtjen e ofruar nga marrja e dy dozave të vaksinës.
Kompanitë thanë se kanë në plan të testojnë përgjigjen imunitare të këtij versioni të ri të vaksinës për Omicron si përmes dhënies së tri vaksinave te personat e pavaksinuar, por po ashtu edhe përmes dhënies së dozës përforcuese te njerëzit që veçse kanë marrë dy dozat e para të vaksinës Pfizer/BioNTech.
Po ashtu do të testohet edhe doza e katërt e vaksinës ekzistuese dhe doza e katërt e vaksinës që ka në shënjestër Omicronin te personat që para gjashtë muajve janë vaksinuar me tri doza të vaksinës Pfizer/BioNTech.
Kompanitë po ashtu planifikojnë të studiojnë sigurinë dhe tolerancën e dozave në mbi 1,400 persona që janë regjistruar për të marrë pjesë në këto prova.
“Ndërsa studimet aktuale dhe të dhënat reale thonë se dozat përforcuese ofrojnë mbrojtje të lartë kundër sëmurjes së rëndë dhe hospitalizimeve nga Omicroni, ne e dimë se duhet të përgatitemi që nëse mbrojtja nga vaksina zbehet me kalimin e kohës dhe për të ndihmuar në shënjestrimin e Omicronit dhe varianteve të reja në të ardhmen”, tha Kathrin Jansen, që udhëheqë departamentin për hulumtime dhe zhvillim të vaksinave në Pfizer.
Pfizer tha se regjimi me dy doza të vaksinës origjinale mund të mos ofrojë mbrojtje të mjaftueshme kundër infektimeve me variantin Omicron.
Megjithatë, Qendrat amerikane për Kontrollin dhe Parandalimin e Sëmundjeve thonë se marrja e tri dozave të Pfizer/BioNTech dhe Moderna ofrojnë 90 për qind mbrojtje nga hospitalizimet. /REL
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
