Ekspertiza e mjekëve ligjorë shqiptarë, ka arritur në përfundimin se ekstremisti grek Kostandin Kacifas është vetëvrarë. Ky është përfundimi i arritur nga Gjykata e Gjirokastrës për vdekjen e Kacifas në fshatin Bularat.
Seanca raportohet se është mbajtur më 13 dhjetor, ku Gjykata e Gjirokastrës vendosi të pranojë kërkesën e prokurorit Julian Çafka, për pushimin e hetimeve të regjistruara lidhur me vdekjen e ekstremistit grek, Kostandin Kacifas në 28 tetor 2018.
Në raportin e ekspertizës, thuhet se dy plagët në trupin e viktimës, janë kryer me puthitje dhe kanë faktorë plotësues, çka flet për vetëvrasje, duke përjashtuar zyrtarisht ekzekutimin e ekstremistit nga forcat policore RENEA.
Pavarësisht se vetëm pak orë pas vdekjes së Kacifas para 3 vjetësh, Policia e Shtetit, doli me një deklaratë duke marrë përsipër autorësinë e vrasjes së minoritarit grek, ekspertiza mjeko-ligjore, rrëzon totalisht versionin zyrtar të autoriteteve shqiptare.
Konkluzioni i ekspertit thotë se viktima ka dy plagë në gjoks të kryera me puthitje nga armë zjarri, me drejtim tejshkues nga para mbrapa. Në pjesën e hyrjes, evidentohen faktorët plotësuese të barutit dhe djegies së lëkurës.
Ndërsa referuar të dhënave të shpërndarjes së gjakut në trupin e kufomës, eksperti mendon se kufoma ka qenë në pozicionin vertikal në momentin e qitjes së armës.
Çështja “Kacifas” solli edhe përplasje mes Gjykatës dhe Prokurorisë në Gjirokastër. Kjo për shkak se Gjykata nuk pranoi kërkesën e prokurorisë më 11 tetor për pushimin e hetimeve për vdekjen e tij, duke e kthyer atë dhe duke urdhëruar kryerjen e disa veprimeve të tjera hetimore. Kacifas ndërroi jetë më 28 tetor 2018, gjatë shkëmbimit të zjarrit me forcat RENEA.
35-vjeçari ishte pjesë e batalionit të Forcave Speciale të Forcës Tokësore, ndërsa ditën e festës kombëtare greke, që përkujton fillimin e luftës me Italinë, qëlloi me kallashnikov ndaj një patrulle policie që ndodhej në fshat, duke rrezikuar jetën e policëve.
Pas lokalizimit nga policia në Bularat, Kacifas nuk iu bind urdhrit për të hedhur armën, duke refuzuar të dorëzohet, madje duke qëlluar me armë në drejtim të RENEA-s për më shumë se 30 minuta. Vdekja e tij shkaktoi përplasje dhe tensione diplomatike mes Greqisë dhe Shqipërisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.