.png)
Ministria e Turizmit dhe Mjedisit ka nxjerrë për konsultim draftin ku thuhet se moratoriumi i gjuetisë mund të shtyhet përsëri me 5 vite të tjera.
Moratoriumi u shty për herë të fundit në vitin 2016 me 5 vite dhe pritej që këtë vit të përfundonte.
Në draft thuhet se do të përjashtohen nga fusha e zbatimit pra nga ndalimi i gjuetisë, rastet kur ajo kryhet për shkak të mbipopullimit të një lloji të faunës së egër, në zonat e lejuara për gjueti dhe në rezervatet e mbarështimit, sipas legjislacionit në fuqi për gjuetinë.
Po kështu në rastet kur gjuetia bëhet për qëllime kërkimore-shkencore.
Në nenin 6 parashikohet se organet që monitorojnë rregullat për ndalimin e ushtrimit së gjuetisë në të gjithë territorin e Republikës së Shqipërisë janë: Ministria e Turizmit dhe Mjedisit nëpërmjet institucioneve të varësisë brenda fushës së përgjegjësisë që mbulon; Ministria e Brendshme nëpërmjet Inspektoratit Kombëtar të Mbrojtjes së Territorit dhe Policisë së Shtetit; Strukturat përgjegjëse kontrolluese/inspektuese në bashki.
Të gjitha këto struktura kanë të drejtë të vendosin gjobë në rast të konstatimit të shkeljes.
Drafti parashikon edhe sanksionet në rastet kur konstatohet shkelje. Në nenin 7 thuhet se shkeljet, kur nuk përbëjnë vepër penale, përbëjnë kundërvajtje administrative dhe dënohen sipas rastit.
Kur shkelja kryhet e organizuar nga operatorët e tureve të gjuetisë, shoqatat e gjuetarëve ose federatat e gjuetarëve, subjekti që e organizon dënohet me gjobë në masën 800 mijë – 1 milion lekë.
Kur shkelja kryhet nga një person ose personi është pjesëtar i subjekteve organizuese, sipas shkronjës “a”, të kësaj pike, personi dënohet me gjobë në masën 80 mijë – 100 mijë lekë.
“Në rastet e përsëritjes së shkeljes nga subjektet, përveç dënimit me gjobë, vendoset si dënim plotësues edhe heqja e lejes së gjuetisë, si dhe konfiskimi i armës së gjahut” thuhet në draft.
Moratoriumi për ndalimin e gjuetisë u miratua fillimisht në mars të vitit 2014 për 2 vite, dhe në vitin 2016 u zgjat edhe me 5 vite të tjera. Qëllimi i këtij ligji ishte ndalimi i ushtrimit të aktivitetit të gjuetisë, për përmirësimin e gjendjes së llojeve të faunës së egër, objekt gjuetie.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje