Pa shumë surpriza dhe ekipet pretendente që kanë marrë tre pikët e para, kështu janë mbyllur ndeshjet e para të Ligës së Kampionëve për fazën e grupeve. Me Inter dhe Barcelonën që fituan në ndeshjet e orës 18:55, ishte radha e Liverpool, Dortmund dhe Atletico Madrid që të merrnin tre pikët e para.
Gjermanët e Borusia Dortmund kanë vuajtur, por deri në fund kanë arritur të marrin tre pikët në transfertën e vështirë belge të Club Brugge në rezultatin 0-1. Fitore e vështirë ka qenë edhe ajo e Atletico Madrid në Monako. Skuadra e Simeone ka përmbysur golin e parë të vendasve brenda pjesës së parë, duke triumfuar 1-2. Ndërkohë Galatasaray ka fituar në shifrat e thella 3-0 me Lokomotiv Moscow, duke i merituar tre pikët e para.
Sakaq dy sfidat e tjera të kësaj mbrëmje të parë të Ligës së kampionëve janë mbyllur në barazim. Napoli është ndalur në shifrat 0-0 me Cervena Zvezda në Serbi, ndërsa sfida Schalke-Porto është mbyllur në shifrat 1-1.
Ndërsa në përballjen kryesore të kësaj mbrëmje mes Liverpool dhe PSG të gjithë tifozët kanë parë spektaklin e vërtetë që ofron ky kompeticion. Gola, penallti, grintë dhe spektakël, praktikisht në këtë ndeshje kemi parë çdo gjë dhe mund të konsiderohet si reklama më e mirë e Ligës së Kampionëve. Në fund ata që kanë dalë fitimtare ishin anglezët që ia dolën të marrin tre pikët e para, duke triumfuar në shifrat 3-2.
Ditën e mërkurë luhen edhe 8 ndeshjet e tjera të fazës së grupeve, ku gjithashtu emocionet dhe spektakli është i garantuar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
