Është hedhur sot shorti i turit të parë eliminator të Ligës së Kampionëve dhe Ligës së Konferencës, ku marrin pjesë edhe 4 skuadra shqiptare. Goglat nuk ishin me shumë fat për Teutën kampione, që do të përballet me moldavët e Sherif Tiraspolit, një ekip që merr pjesë rregullisht në Kupat e Europës dhe me një buxhet shumë më të madh se durrsakët.
Më shumë fat patën në short 3 skuadrat e Ligës së Konferencës. Edhe Partizani do të ndeshet me një skuadër moldave, Stinful. Të kuqtë, të cilët ishin në vazon e skuadrave favorite në short, kanë shanse të mëdha për të kaluar më tej. Edhe Laçi bënte pjesë te skuadrat favorite dhe shorti e ka vënë përballë malazesëve të Podgoricës.
Vllaznia, që u shortua si skuadër jo favorite, do të diskutojë kualifikimin për në turin e dytë ndaj boshnjakëve të Shiroki Brijeg. Shkodranët sapo kanë konfirmuar trajnerin Bërdariç dhe kanë nisur madje edhe fushatën e përforcimeve.
Ndeshjet e para në Ligën e Konferencës luhen më 8 korrik, kurse ato të kthimit më 15 korrik. Vllaznia dhe Partizani e luajnë në transfertë ndeshjen e parë, Laçi në fushën e tij.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.