Një ish-efektiv policie ka qëlluar me armë zjarri bashkëshorten e tij, me të cilën ishte në proces divorci. Ngjarja ka ndodhur në Elbasan dhe viktima, Liljana Buzo, 54 vjeçe, është qëlluar me automatik kallashnikov në momentin kur çifti po dilte nga Gjykata e Rrethit Gjyqësor të këtij qyteti.
Të plagosur kanë mbetur edhe dy persona të tjerë, dy kalimtarë të rastit, Gëzim Toçila i cili ndodhet në spital, jashtë rrezikut për jetën si dhe Adriatik Kola.
Policia e Elbasanit ka vënë në pranga autorin, i cili mësohet se është Koço Buzo, 58-vjeç, një ish-punonjës i Policisë së Shtetit.
Gjithçka ka ndodhur pas seancës së radhës për procesin e divorcit mes tyre, ku pasi ka dalë jashtë, Koço Buzo ka nxjerrë armën kallashnikov, duke vrarë në vend bashkëshorten e tij. Fillimisht gruaja ka mbetur e plagosur dhe ka ndërruar jetë rrugës për në spital.
Autori i krimit, ka tentuar të largohet nga vendi i ngjarjes, por është arrestuar nga forcat e rendit. Çifti ishin prindër të tre fëmijëve, konkretisht një vajze 26-vjeçe, dhe dy djemve 20 dhe 18 vjeçar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
