Mesfushori i Kombëtares shqiptare, Amir Abrashi, është kthyer në kampionatin e Zvicrës. Në mënyrë të papritur ai ka lënë Frajburgun për të luajtur si i huazuar deri në fund të këtij sezoni me Bazelin, ku do të bashkohet me mesfushorin tjetër kuqezi, Taulant Xhakën.
Klubi i njohur zviceran ka postuar në faqet zyrtare lajmin e afrimit të Abrashit, i cili e njeh mirë këtë kampionat, pasi është aktivizuar më parë me disa skuadra, ku veçohet Grasshopersi. Nëse gjërat shkojnë mirë, Bazeli ka të drejtën e blerjes së kartonit të futbollistit 30-vjeçar.
Abrashi ishte larguar nga Zvicra në vitin 2015, kur nënshkroi me Frajburgun në Gjermani. Ai ka pasur momente të mira me këtë klub, ku shpesh ka luajtur titullar, por dëmtimet e shumta e kanë kushtëzuar jo pak paraqitjen e mesfushorit. Ai është ndër të paktët lojtarë me përvojë që janë ende pjesë e Kombëtares së drejtuar nga trajneri Reja.
Aktivizimi me Bazelin pritet ta ndihmojë mesfushorin luftarak që të kapë formën optimale dhe të jetë gati për ndeshjet e Kombëtares në muajin mars.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
