Një sherr mes një grupi të rinjsh ka ndodhur sot në Peshkopi, ku për pasojë është plagosur me mjet prerës një 22-vjeçar.
Policia ka ndërhyrë dhe ka parandaluar përshkallëzimin e konfliktit, duke arrestuar autorin e plagosjes dhe proceduar penalisht në gjendje të lirë 5 shtetas të tjerë.
“Shërbimet e Policisë kanë marrë njoftim se në lagjen ‘Treg’, Peshkopi, po ndodhte një konflikt fizik mes disa të rinjve, ku falë ndërhyrjes së menjëhershme të shërbimeve të Policisë, është bërë e mundur parandalimi i përshkallëzimit të mëtejshëm të konfliktit, kapja dhe arrestimi i shtetasit:
E. S., 26 vjeç, banues në Maqellarë, Dibër, për veprën penale ‘Plagosje e rëndë me dashje’”, thuhet në njoftimin e policisë.
Sipas policisë, 26-vjeçari gjatë konfliktit për motive të dobëta, ka plagosur me mjet prerës, shtetasin T. T., 22 vjeç, banues në Peshkopi, i cili ndodhet në spital, jashtë rrezikut për jetën.
“Po në vijim të veprimeve hetimore për zbardhjen e ngjarjes, ka rezultuar se janë përfshirë në konflikt për të cilët ka filluar procedimi penal në gjendje të lirë për veprat penale ‘Plagosje e lehtë me dashje’ e kryer në bashkëpunim, ‘Moskallëzim krimi’, ‘Drejtimi i automjetit në mënyrë të parregullt’, për shtetasit: Xh. C., 25 vjeç, M. A., 23 vjeç, Xh. A., 26 vjeç, B. S., 23 vjeç, Xh. L., 15 vjeç, banues në Dibër”, vijon më tej policia.
Materialet proceduriale i kaluan Prokurorisë pranë Gjykatës së Shkallës së Parë Dibër për veprime të mëtejshme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
