.png)
OFL kërkon bashkëpunim me policinë suedeze për operacione të përbashkëta. Ishte drejtori i Përgjithshëm, Ardi Veliu që ia ka propozuar një gjë të tillë ministrit të Brendshëm të Suedisë.
“Drejtori i Përgjithshëm e ka njohur ministrin Damberg me rezultatet e OFL-së dhe në këtë kuadër ka propozuar që bashkëpunimi me Policinë suedeze të shtrihet edhe në hetime dhe operacione të përbashkëta, si ato që jemi duke i zhvilluar me partnerët e tjerë, pasi Policia e Shtetit tashmë është një organizatë me besueshmëri të plotë te homologët”, thuhet në njoftimin e policisë.
Nga ana tjetër, ministri suedez Damberg ka vlerësuar bashkëpunimin dhe ka mirëpritur propozimin e drejtor Veliut për ta shtrirë bashkëpunimin në hetime të përbashkëta për individë dhe grupe që merrem me krim të organizuar. Ai ka theksuar se pavarësisht se krimi në Suedi është në ulje po shtohen kapacitetet policore për të luftuar grupet kriminale dhe sekuestruar drogën e armët që vijnë nga vendet e tjera.
Në fokus të këtij takimi ishte forcimi i bashkëpunimit mes Policisë shqiptare dhe asaj suedeze.
Gjatë takimit, kryepolici Veliu i prezantoi mënyrën e funksionimit dhe strukturën e Policisë së Shtetit dhe e njohu Ministrin e Brendshëm suedez z. Mikael Damberg, me disa tregues dhe rezultatet e arritura sidomos dy vitet e fundit, në drejtim të goditjes së krimit të organizuar, goditjes së grupeve kriminale nëpërmjet operacioneve dhe hetimeve të përbashkëta me partnerët, për uljen e krimeve ndaj personit dhe parandalimin e kultivimit dhe trafikimit të kanabisit.
Ndër të tjera, drejtori Veliu “ka siguruar ministrin e Brendshëm të Suedisë dhe përfaqësuesit e ambasadës suedeze në Tiranë se Policia e Shtetit është e vendosur për të punuar së bashku me partnerët dhe për të mbështetur çdo iniciativë e veprim që i shërben rritjes së efikasitetit të luftës kundër krimit të organizuar dhe terrorizmit”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
