Dy persona kanë gjetur vdekjen si pasojë e një atentati të kryer në qytetin e Durrësit rreth orës 19:00 të mbrëmjes së të hënës.
Ngjarja e rëndë ka ndodhur në lagjen nr.14 Nishtulla të Durrësit. Viktima janë Dorian Shkoza, 35-vjeç, person me precedentë penalë dhe i dënuar me 8 vjet burg për trafik lëndësh narkotike dhe Anxhelo Avdiaj.
Ndaj dy personave është qëlluar me breshëri automatiku nga një makinë në ecje. Forca të shumta policore mbërritën menjëherë në vendin e ngjarjes, ndërkohë që postblloqe të shumta dhe kontrolle nisën të kryheshin në rrugët hyrëse dhe dalëse të qytetit të Durrësit.
Policia kishte identifikuar targën e automjetit, por rezultoi më vonë se targa ishte e vjedhur dhe pak ndihmon grupin hetimor në zbardhjen e krimit. Targa së bashku me makinën e djegur u gjetën rreth një orë pas ngjarjes në afërsi të Rrogozhinës.
Ndërkohë, gazeta “Si” mëson se Dorian Shkoza, njëri prej viktimave të atentati ishte pjesë e listës emërore të “Operacionit Forca e Ligjit” dhe pritej që në ditët në vazhdim zëdhënësja e OFL-së të shqiptonte emrin e tij për të justifikuar pasurinë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
