.png)
Fondi prej 130 milionë lekësh i vënë në dispozicion nga buxheti i shtetit për partitë politike pjesëmarrëse në zgjedhjet e 25 prillit do të ndahet vetëm në katër pjesë, aq sa është edhe numri i partive që e kaluan pragun kombëtar prej 1 për qind për ta përfituar këtë fond.
Për herë të parë, paratë do të ndahen sipas formulës së votave qytetare të marra në zgjedhje dhe jo mbi bazën e numrit të mandateve të deputetëve që partitë kanë nxjerrë. Formula e re pjeston fondin total prej 130 milionë lekësh me numrin e votave të vlefshme të partive që kanë kaluar pragun e 1 përqindëshit. Nga ky pjestim, KQZ përcaktoi me vendim se një vota ishte e barabartë me rreth 85 lek.
Pothuajse gjysma e këtyre parave do të shkojnë për Partinë Socialiste, që përfiton 48.6 për qind të tij, ndjekur nga PD me 39.4 për qind, LSI me 6.8 për qind dhe PSD me 2.2 për qind të parave.
Kërkesa e partive të tjera që kërkuan kompensim u rrëzua nga KQZ, që ishte në pritje të vendimit të Gjykatës Kushtetuese ndaj padisë së ngritur nga pesë aleatët e PD-së kundër skemës së financimit të përcaktuar pas ndryshimeve të Kodit Zgjedhor.
Ndërkohë, një tjetër vendim i marrë ishte edhe gjobitja me 1 dhe 2 milionë lekë e 106 partive të vogla që nuk dorëzuan brenda afateve raportet me bilancet financiare për vitin 2020. Vetëm 11 nga këto parti morën pjesë në zgjedhjet e 25 prillit, kryesisht brenda dy koalicioneve, atij të udhëhequr nga PD dhe atij të udhëhequr nga Partia Konservatore e Kujtim Gjuzit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
