Policia e Tiranës ka arrestuar 6 persona, pasi i ka kapur duke shkëmbyer kanabis dhe ka sekuestruar 37.5 kg kanabis sativa.
Policia thotë se janë vënë në pranga shtetasit: – A. T., 35 vjeç, banues në Tiranë (organizatori); J. Ç., 22 vjeç, banues në Tiranë; R. D., 23 vjeç, banues në Tiranë; F. B. (O.), 30 vjeç, banues në Tiranë; R. J., 39 vjeç, banues në Tiranë; Xh. K., 37 vjeç, banues në Tiranë.
“Pas mbajtjes në vëzhgim të mjeteve me të cilat këta shtetas po qarkullonin dhe mbi bazën e dyshimit të arsyeshëm se në këto mjete ndodhej lëndë e dyshuar narkotike gati për shitje, në vendin e quajtur Qafë Priskë, në rrugën e Dajtit, shërbimet e Policisë kanë ndaluar për kontroll dy mjetet me të cilat këta shtetas po qarkullonin”, vijon policia në njoftimin e saj.
Gjatë kontrollit të ushtruar në mjetin tip “Volkswagen Lupo”, me drejtues shtetasin J. Ç. dhe pasagjer shtetasin R. D., në pjesën e pasme të automjetit, shërbimet e Policisë kanë gjetur tri qese plastike me lëndë të dyshuar cannabis sativa.
Ndërsa, gjatë kontrollit të ushtruar në mjetin tip “Golf”, me drejtues shtetasin A. T. dhe pasagjer shtetasit Xh. K., F. B.(O.) dhe R. J., shërbimet e Policisë i kanë gjetur drejtuesit të mjetit shtetasit A. T., 8500 euro dhe 4700 lekë (me të cilat dyshohej se do të blinte lëndën narkotike).
Nga kontrolli i ushtruar në të dyja mjetet janë sekuestruar në cilësinë e provës materiale:
– tri qese me lëndë të dyshuar narkotike cannabis sativa me peshë 37.5 kg;
– 8500 euro dhe 4700 lekë;
– 8 aparate celular.
Materialet iu referuan për veprime të mëtejshme, Prokurorisë së Rrethit Gjyqësor Tiranë, për veprën penale “Prodhimi dhe shitja e lëndëve narkotike, e kryer në bashkëpunim”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.