.png)
Nga Gazeta 'Si'-Avionët luftarakë izraelitë vazhduan të godasin Gazën të dielën në mëngjes, ndërsa Forcat e Mbrojtjes të Izraelit (IDF) u kërkuan banorëve izraelitë që të evakuonin zonën gjatë natës. Në të njëjtën kohë, artileria po godet gjithashtu një zonë në Liban në përgjigje të “zjarrit” nga Libani në drejtim të Izraelit.
Ministria e Shëndetësisë në Palestinë njoftoi se 256 palestinezë, përfshirë 20 fëmijë, janë vrarë nga sulmet ajrore izraelite në 24 orët e fundit. Ndërkohë, numri i të plagosurve është rreth 1800.
“IDF ka marrë masa përgatitore dhe do të vazhdojë të operojë në të gjitha rajonet dhe në çdo kohë të nevojshme për të garantuar sigurinë e civilëve izraelitë”, thuhet në një deklaratë. Forcat izraelite goditën 426 objektiva në Gaza, përfshirë 10 kulla të përdorura nga Hamasi, tha zëdhënësi i IDF, Daniel Haggari.
Dhjetëra mijëra ushtarë izraelitë po operojnë në terren rreth Rripit të Gazës. Shifrat e fundit zyrtare thonë se të paktën 250 izraelitë dhe 230 palestinezë janë vrarë në sulme deri më tani, edhe pse ekspertët thonë se, ndërsa pluhuri zbehet këto shifra mund të rriten në mënyrë dramatike.
Kryeministri izraelit Benjamin Netanyahu u zotua për “hakmarrje” për këtë “ditë të zezë” në historinë e shtetit hebre. “Hamasi ka nisur një luftë mizore dhe të egër. Ne do ta fitojmë këtë luftë, por çmimi është i padurueshëm”, theksoi ai. “Hamasi dëshiron të na vrasë të gjithëve. Është një armik që vret nënat dhe fëmijët në shtëpitë e tyre, në shtretërit e tyre. Një armik që rrëmben të moshuarit dhe fëmijët”, shtoi ai.
Autoritetet thonë se dhjetëra izraelitë, duke përfshirë gra dhe fëmijë, po mbahen peng në Gaza. Në raportimet e fundit thuhet se forcat izraelite të sigurisë kanë marrë kontrollin e një stacioni policie në qytetin jugor të Sderot, duke vrarë të paktën 10 luftëtarë palestinezë pas një përplasjeje një orëshe. Më herët kishte raportime se forcat izraelite shkatërruan një pjesë të stacionit të policisë me një buldozer për të hyrë në objekt.
Shtetet e Bashkuara dhe Izraeli po diskutojnë ndihmën e mundshme ushtarake. Kështu ka thënë një zyrtar i administratës amerikane.
Zyrtari shpjegoi se një njoftim nga Uashingtoni është i mundur që sot, por vuri në dukje se situata në Kongres - ku Dhoma është aktualisht pa një udhëheqës - do ta komplikojë çështjen.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
