Dhënia e bakshishit është një temë shumë e diskutuar midis turistëve, kryesisht sepse praktikat e bakshishit ndryshojnë shumë nga vendi në vend.
Në shumicën e destinacioneve, dallimet janë të vogla, shumë punonjës shërbimi e pranojnë shpërblimin monetar për këshillat apo shërbimet e ndryshme, që u ofrojnë turistëve.
Por, ka disa vende ku bakshishi nuk është një praktikë standarde, ndërsa në disa të tjera, bakshishi bie ndesh me kulturën e vendit.
Polinezia Franceze
![](https://gazetasi.al/wp-content/uploads/2023/05/polinezi.jpg)
Në këtë vend, që përfshin një zonë të Paqësorit përafërsisht me madhësinë e Europës Kontinentale, kultura mbizotëruese është ajo e mikpritjes pa detyrime apo pritshmëri.
Për shkak të kësaj, bakshishi nuk pritet dhe përpjekjet për të dhënë bakshish mund të refuzohen. Në restorante dhe hotele, është e zakonshme, që menaxheri ose pronari, të lëshojnë faturat dhe të marrin pagesën.
Japonia
![](https://gazetasi.al/wp-content/uploads/2023/05/japoni-1.jpg)
Në Japoni, kudo shërbimi është shumë i mirë dhe bakshishi nuk është pjesë e kulturës. Dhënia e bakshishit, mund të shihet si një veçim i turpshëm i individit në dëm të përpjekjes kolektive.
Për shembull, dhënia e bakshishit një kamarieri në restorant, do të shihej si njohje dhe vlerësim i shërbimit të tij, por jo e ekipit të kuzhinës, që përgatiti vaktin.
Ndonëse mund të mos konsiderohet veprim veçanërisht i vrazhdë apo fyes, pasi shumë japonezë e dinë mirë se kultura e bakshishit ekziston jashtë Japonisë, mund të duket si veprim mjaft i çuditshëm.
Një tjetër pengesë ndaj bakshishit në Japoni, është se kalimi i parave nga dora në dorë konsiderohet jo-higjenike. Shumica e restoranteve dhe dyqaneve ofrojnë një tabaka plastike, për të vendosur paratë gjatë kryerjes së një pagese.
Koreja e Jugut
![](https://gazetasi.al/wp-content/uploads/2023/05/kores-600x550.jpg)
Ngjashëm me Japoninë, kultura e Koresë së Jugut është e rrënjosur në Konfucianizmin, i cili i jep vlerë krenarisë për punën, përpjekjet e njohjen kolektive.
Megjithatë, disa restorante të stilit perëndimor, veçanërisht në hotele, shtojnë në faturë tarifë shërbimi.
Një përjashtim nga rregulli i ndalimit të bakshishit në Korenë e Jugut, janë udhërrëfyesit turistikë, të cilët presin një shpërblim prej 10-15% të çmimit të turneut. Por, bakshishi për udhërrëfyesit turistikë duhet të jepen me maturi, mundësisht në një zarf.
Kina
![](https://gazetasi.al/wp-content/uploads/2023/05/kine-1-825x550.jpg)
As në Kinë nuk pranohet bakshishi. Madje, mund të shihet si një përpjekje fyese për të bërë bamirësi, sikur dhënia e bakshishit nënkupton, që marrësi “duket sikur ka nevojë për para”.
Madje ka disa institucione në Kinë, si aeroportet, ku bakshishi është i ndaluar me rregullore. Udhërrëfyesit turistikë janë një përjashtim, si në vendet e tjera pa bakshish, dhe bakshishi duhet të jepet me maturi.
Ndërsa bakshishi është i pazakontë në Kinën kontinentale, duhet theksuar se Rajonet Administrative të Veçanta, Hong Kongu dhe Makao, vazhdojnë të ndjekin zakonet e bakshishit nga epoka koloniale europiane.
Kështu që, kultura e bakshishit në këto pjesë të Kinës, është shumë më perëndimore.
Fixhi
![](https://gazetasi.al/wp-content/uploads/2023/05/fixhi.jpg)
Ashtu si në Polinezinë Franceze, Fixhi është një shoqëri kolektive, kështu që bakshishi nuk pritet dhe as nuk kërkohet. Bakshishi mund të konsiderohet si vlerësim i pakëndshëm individual i një përpjekjeje kolektive.
Megjithatë, në disa resorte, mund të vendosen kuti grumbullimi “Staff Christmas Fund”, ku mblidhen paratë për t’u shpërndarë rregullisht, në mënyrë të barabartë, midis stafit. / Fodor’s Travel
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.