.png)
Nga Gazeta 'Si'-Luftimet mes ushtrisë izraelite dhe Hamasit kanë vazhduar edhe gjatë natës. Rreth 1.100 njerëz janë konfirmuar të vdekur në Izrael dhe Gaza pas sulmit masiv të koordinuar nga militantët e Hamasit që filloi herët të shtunën.
Forcat e Mbrojtjes të Izraelit deklarojnë se numri i të vdekurve do të vazhdojë të rritet pasi një numër i madh njerëzish janë plagosur rëndë.
Ekipet e shpëtimit thonë se kanë gjetur 260 trupa në një festival muzikor i cili u sulmua nga militantët e Hamasit.
OKB ka deklaruar se sulmet ajrore hakmarrëse të Izraelit kanë zhvendosur 123.000 palestinezë në Gaza dhe afro 74.000 kërkojnë strehim në shkolla.
Spitalet në Gaza janë tejmbushur dhe po përballen me ndërprerjet e energjisë elektrike. OKB-ja thotë se burimi i fundit i energjisë i Gazës, i vetmi termocentral i saj, mund të mbetet pa karburant brenda disa ditësh. Disa vende të tjera kanë thënë se qytetarët e tyre janë vrarë ose rrëmbyer nga Hamasi.
Të dielën në mbrëmje, raketat po lëshoheshin ende nga enklava palestineze e Gazës në jug të Izraelit, deklarojnë mediat ndërkombëtare.
SHBA-ja e ka afruar aeroplanmbajtësen e saj më afër Izraelit, ndërsa Presidenti Joe Biden premtoi mbështetjen ‘të qëndrueshme’ të Uashingtonit për Tel Avivin. Ai ka thënë se do të dërgojë më shumë armë, një lëvizje e denoncuar si “agresion” nga Hamasi.
Zyrtarët amerikanë presin që Izraeli të nisë një inkursion tokësor në Gaza brenda 48 orëve të ardhshme.
Ndërkohë çmimet e naftës u rritën të hënën, ndërsa investitorët vlerësuan mundësinë e një konflikti të zgjatur në rajonin prodhues të naftës
Një valë sulmesh e nisur nga grupi militant Hamas të shtunën në mëngjes ishte përshkallëzimi më i madh midis dy palëve për dekada.
Shtetet e Bashkuara presin që Izraeli të nisë një operacion të madh tokësor kundër Hamasit në Gaza në 24 deri në 48 orët e ardhshme.
Këtë e raporton Washington Post , duke cituar disa burime, sipas të cilave Izraeli ka kërkuar nga Shtetet e Bashkuara raketa për Kupolën e Hekurt, bomba me diametër të vogël, municion automatiku dhe bashkëpunim më të madh në ndarjen e informacionit të inteligjencës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
