Tani te Lacio janë më të qetë, pas vendimit zyrtar për përfundimin e pjesës së mbetur të Serisë A në fushë. Lotito dhe Tare kanë qenë mjaft kritikë kohët e fundit, kur diskutohej për rifillimin e kampionatit. Ata donin me çdo kusht që ndeshjet të luhen, sepse Lacio është 1 pikë pas Juventusit kryesues dhe ka shanse reale për titullin kampion në Serinë A.
Dhe për ta motivuar edhe më shumë skuadrën, presidenti Klaudio Lotito ka përcaktuar shifrën e shpërblimit që futbollistët do të përfitojnë, nëse shkojnë të parët në finish. 10 milionë euro është shuma që Lotito ka vendosur në dispozicion të ekipit për fitimin e titullit. Kështu, Strakoshës dhe shokëve të tij do t’u takojnë 400 mijë euro për kokë, një shumë e konsiderueshme që me siguri do t’i karikojë më tepër në fushë ata.
Lotito ia kishte bërë të ditur skuadrës se kishte në plan të vendoste një shpërblim për titullin. Lajmi, siç është e lehtë të imagjinohet, është pritur me entuziazëm nga futbollistët e ekipit bardhekaltër. Tani pritet data 3 qershor, kur kthehet kapiteni Senad Luliç dhe më pas do të depozitohet gjithçka në Ligë, siç e kërkon procedura. Lacio është vetëm 1 pikë pas Juventusit dhe ka siguruar një vend në Ligën e Kampionëve, që mund të konsiderohet një arritje, por tashmë Tare, Strakosha dhe gjithë të tjerët duan të bëhen pjesë e rëndësishme e klubit italian, duke fituar edhe titullin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.