.png)
Sekretari amerikan i Mbrojtjes James Mattis do të vizitojë të dielën Shkupin për të konfirmuar mbështetjen e SHBA ndaj Maqedonisë për integrimin e saj në NATO dhe zotimin e vazhdueshëm amerikan për paqe dhe siguri në rajon. Sipas një njoftimi të lëshuar nga Pentagoni, Sekretari Mattis do të ketë takim me Kryeministrin Zoran Zaev, ndërsa vendi është në kulmin e fushatës për referendumin e 30 shtatorit.
Mattis tha për Reuters se ishte i shqetësuar për shkak të përfshirjes së mundshme ruse në çështjen e referendumit të pritshëm në Maqedoni. “Do të shkoj t’i vizitoj miqtë tanë në Maqedoni dhe në mënyrë të qartë do të bëj me dije se SHBA-ja e përkrah popullin e Maqedonisë”, tha ai. Sekretari amerikan I mbrojtjes ka shtuar më tej se Rusia edhe më parë është përfshirë në raste të tilla, që nga Estonia e deri tek Shtetet e Bashkuara, nga Ukraina e deri në Maqedoni.
Por sot Shkupin e viziton një tjetër zyrtar i lartë amerikan. Wess Mitchel Ndihmës-Sekretar i Shtetit, do të shprehë mbështetjen amerikane për referendumin e 30 shtatorit, ku duhet të vendoset për emrin e ri të Maqedonisë.
Referendumi shikohet si historik. Një rezultat pozitiv do t’ia hapte rrugën vendit ballkanik për t’u bërë anëtari i tridhjetë i Aleancës së Atlantikut të Veriut dhe do ta përshpejtonte procesin e integrimit në Bashkimin Evropian.
Javën e shkuar Shkupin e vizitoi Kancelarja e Gjermanisë Angela Merkel, Kancelari austriak Sebastian Kurz si edhe Sekretari I Përgjithshëm I NATO-s, Jens Stoltenberg.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
