Vullkani më aktiv i Europës është “zgjuar” për herë të dytë këtë vit, duke shpërthyer me shtëllunga hiri e llave.
Sikur të mos mjaftonte kjo, një tërmet i shkallës 4.8 ka goditur Sicilinë, afër malit vullkanik duke plagosur të paktën dhjetë persona.
Disa ndërtesa janë dëmtuar, ndërkohë që dhjetëra lëkundjeve kanë goditur ishullin italian, pas aktivizimit të Etnës së hënën.
Hiri vullkanik ka mbuluar fshatrat e afërta ndërsa të gjitha fluturimet nga aeroporti i Katanias janë anuluar.
Banorët e fshatrave në zonat malore janë udhëzuar që të lënë menjëherë shtëpitë dhe të strehohen në qytet. Tërmeti i fundit ka ndodhur në orën 2:19 të mëngjesit të së mërkurës afër komunës, Viagrande.
Mediat italiane kanë raportuar për panik në mesin e banorëve, shumica e të cilëve kanë qëndruar nëpër rrugë deri në daljen e diellit.
Etna ka qenë kryesisht në gjumë për dy vitet e fundit, por riaktivizimi dhe tërmetet e njëpasnjëshme në Sicili po ndiqen me mjaft shqetësim nga ekspertët, të cilët ngrenë alarmin se lëkundjet mund të çojnë drejt një shpërthimi edhe më të madh.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.