Pas 24 javësh kampionat, ka ndryshuar renditja e Serisë A, ku pas Juventusit është Lacio dhe në vend të tretë Interi. Fitorja 2-1 me përmbysje ndaj Interit rival ka bërë që Lacio ta parakalojë dhe të besojë realisht për titullin kampion në Itali, duke qenë se diferenca me Juventusin është vetëm 1 pikë.
Rezultati i sfidës Lacio-Inter ka sjellë buzëqeshje edhe në kampin juventin, pasi Interi ka mbetur 3 pikë prapa në garën që duket se do të mbetet e hapur deri në fund të kampionatit. Biznesmeni i njohur italian, Lapo Elkan, pjesëtari i familjes Anjeli që ka në pronësi Juventusin, ka bërë ironi, duke vënë gishtin në plagën e interistëve me një mesazh në Tuiter, ku shkruan: “Zebra qesh, shqiponja fluturon”. Elkan i referohet fitores së Lacios, që ka si simbol shqiponjën, fitore që ka sjellë kënaqësi edhe te Juventusi, simboli i të cilit është zebra.
Ende nuk ka pasur një reagim nga ana e klubit të Interit në lidhje me këtë mesazh. Situata duket se ka filluar të nxehet para kohe. Juventusi dhe Interi do të ndeshen mes tyre më 1 mars dhe kjo ndeshje, apo derbi i Italisë, siç quhet, do të përcaktojë shumë sa i takon titullit. Për momentin, situata është e gjitha në favor të Juventusit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.