.png)
Gazeta Si - Policë dhe të shoqëruar tregojnë me detaje, se si pasi arritën të dilnin nga nëntoka ku gjenden qelitë e policisë së Kamzës, polici Hajredin Boja ka zbritur sërish përmes tymit.
Në prag pensioni, ashtu si edhe kolegu tjetër nën hetim, Boja u pa duke zbritur shkallëve mes tymit dhe zjarrit që po përpinte çdo gjë, ku ata nuk mundën të gjenin dot të riun Arben Mici, i arrestuar për dhunë në familje dhe i lënë nga gjykata nën masën “arrest me burg”.
Detajet ekskluzive bëhen në ditura për Gazetasi.al nga burimet që e hetuan rastin dhe që referojnë pjesë dëshmish edhe nga dy të shoqëruarit, të cilët u mbajtën në hyrje të policisë nga frika se mos arratiseshin.
“Dilni pas nesh”, - kujton I.T., lutjen e njërit prej policëve të Komisariatit të Kamzës, teksa përbri pa një burrë të djegur në kokë dhe në krahë. I riu ishte shoqëruar në orën 18:00 në polici dhe priste të dilte.
“Ai u ul në njërën nga këto qeli nën tokë dhe më pas, pa që aty sollën dhe një të shoqëruar tjetër që nuk i foli. Një orë pasi kishte hyrë në polici për t’u verifikuar në këtë dhomë të zhveshur, dëgjoi zhurma. Zgjati kokën, por nuk po shikonte asgjë”, - përmend I.T., gjatë seancave të pyetjeve nga agjencia e mbikëqyrjes, duke theksuar se pas zhurmave më pas u fikën dritat.
“Më pas erdhi një punonjës policie, i quajtur Fatmir, i cili tha: ‘Dilni pas nesh’”, - tregon qytetari për incidentin, ku u asfiksuan tre persona dhe njëri ndër ta ndërroi jetë.
“Në momentin që është hapur dera, kam parë tym dhe zjarr tek dhoma e personave të arrestuar. Gjatë kësaj kohe kam parë një person të shëndoshtë që po ngjitej së bashku me ne dhe që kishte të djegur njërën anë të kokës, flokët dhe kishte flluska në krahun e djathtë”, - rrëfen ai.
I riu kujton se teksa po ngjisnin katin e parë, ka parë sërish oficerin Hajredin Boja që u dëmtua dhe që gjendet ende në gjendje arresti, të futej sërish në katin e nëndheshëm, ku duhet të kishte persona të tjerë.
Rrëfimi ekskluziv iu bë me dije Gazetasi.al gjatë komunikimit me oficerë policie, por edhe me persona të tjerë okularë, të cilët u gjenden në fundjavë në Komisariatin e Kamzës, i cili u përfshi nga flakët e ndezura nga 26-vjecari nga fshati Çekrezë.
Teksa polici Boja kishte zbritur jashtë, i riu I.T., kujton se iu lut oficerëve t’i nxirrnin jashtë, pasi po mbushej gjithçka me tym.
“Më pas nuk kam asnjë dijeni, pasi më kanë transferuar në ambientet e policisë rajonale të Tiranës, - shton ai. - Unë jam duhanpirës, por atë ditë nuk kisha duhan me vete”.
Teksa polici Boja është në gjendje të rëndë shëndetësore nga asfiksia dhe insufiçenca respiratore dhe po trajtohet me oksigjen, kolegët e tij kanë vendosur masën e arrestit për të.
Kjo u përshkrua për Gazetasi.al nga burimet pranë pavijonit të toksikologjisë, që thanë se dy oficerë shkuan në spital dhe vendosën arrest për të sëmurin, por polici tjetër, i quajtur Fatmir Isufi dhe që po ashtu po procedohet për shpërdorim detyre, tregon se si gjithçka ndodhi shumë shpejt.
“Isha ulur në karrige në vend shërbimin tim dhe pashë që nga vendi ku ishte Arben Mici, po dilte tym dhe u përhap shumë shpejt. Në atë kohë kam reaguar shumë shpejt dhe kam ndihmuar Hajredinin që të hapte derën e hekurit dhe më pas kemi hyrë në korridorin e dhomave dhe u futëm fillimisht në dhomën ku ishte Arben Mici, por nuk pamë asgjë aty, pasi kishte shumë tym, - tregon punonjësi i policisë. - Në atë kohë na ka ardhur përballë Dilaver Idrizi, se ishte shumë thellë kësaj dhome. Unë kam marrë Dilaverin që ishte me masë sigurie, kam marrë dhe dy të shoqëruarit dhe pastaj erdhën kolegë të tjerë që na ndihmuan. Kolegu Hajredin Boja zbriti për të gjetur Arbenin që nuk e gjetëm në qelinë e tij. Më pas nuk kam parë më se çfarë është bërë me të, por Hajredinin e nxorën kolegët të asfiksuar. Arbeni u gjet nga zjarrfikësit në dhomën e tualetit”.
Ekspertët e kriminalistikës, i tregojnë Gazetasi.al se u gjetën materiale batanijesh dhe sfungjeri, si dhe një paketë duhani me tetë filtra, ndërkohë që në trupin e Arben Micit iu gjetën në xhepa pesë cigare, një paketë ‘Slims’, si dhe një çakmak me ngjyrë blu, me mbishkirmin “Bic”, ku këmbëza e gazit mungon, thonë ekspertët. Sipas tyre, brenda saj ka gaz, pasi u provua se çakmaku ndizej normalisht.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
