.png)
Nga Gazeta ‘Si’- Në seancën e nesërme parlamentare(18 shtator) e cila mund të zgjasë deri të premten, kryesocialisti Edi Rama do të prezantojë programin qeverisës për katër vitet e ardhshme.
Programi, i cili është 59 faqe, mbështetet në tre shtylla kryesore: Shqipëria Europiane, Rritja Ekonomike e Qëndrueshme dhe Mirëqenia për të Gjithë.
Sipas qeverisë, anëtarësimi në Bashkimin Europian deri në vitin 2030 mbetet prioriteti kryesor, ndërsa programi synon të forcojë shtetin e së drejtës, të modernizojë administratën digjitale, të zhvillojë ekonominë dhe të përmirësojë shërbimet për qytetarët.
Sipas programit, reforma në drejtësi do të konsolidohet me miratimin e kodit të ri penal e atij civil, përmirësimin e infrastrukturës gjyqësore dhe reduktimin e korrupsionit. Po ashtu, parashikohet forcimi i diplomacisë dhe i rolit të diasporës në zhvillim.
Programi synon rritje ekonomike mesatare 4% në vit dhe rritjen e të ardhurave për frymë në 15 mijë euro deri më 2029. Do të vijojë konsolidimi fiskal, ulja e borxhit publik dhe ruajtja e politikës së taksës 0% për bizneset e vogla.
Mbështetja për sipërmarrjen referuar programit, përfshin marrëveshje tatimore afatgjata dhe nxitje të startup-eve përmes teknoparkut “Durana Tech Park”.
Investimet në infrastrukturë përfshijnë 700 km rrugë të reja, përfundimin e Korridorit Blu, modernizimin e hekurudhave dhe zgjerimin e rrjetit të internetit.
Turizmi shihet si motor zhvillimi, duke u synuar transformimi i Shqipërisë në destinacion gjithëvjetor dhe zgjerimi i agroturizmit e ekoturizmit.
Po ashtu, sipas programit, energjia, bujqësia dhe zhvillimi rural do të mbështeten me reforma strukturore dhe digjitalizim të shërbimeve.
Në arsim, qeveria parashikon 1000 laboratorë inteligjentë, fuqizimin e arsimit profesional dual dhe ndërkombëtarizimin e universiteteve shqiptare.
Shëndetësia do të konsolidohet me rindërtimin e qendrave shëndetësore, transformimin e QSUT në qendër ekselence dhe shëndetësinë digjitale.
Politikat sociale parashikojnë zgjerimin e programeve të strehimit, mbështetje për familjet dhe personat me aftësi të kufizuara, si dhe rritjen e shërbimeve për fëmijët dhe të rinjtë. Rinia do të përfitojë nga programe praktike pune, mbështetje për startup-et dhe qendra inovacioni në çdo bashki.
Programi parashikon modernizimin e sigurisë publike përmes projekteve “Smart City”, hartës digjitale të kriminalitetit dhe përdorimit të dronëve. Po ashtu, synohet ulja me 30% e fataliteteve rrugore deri më 2030 dhe përmirësimi i menaxhimit të kufijve sipas standardeve të Schengen-it.
Në mjedis, fokusi mbetet tek mbrojtja e biodiversitetit dhe lufta kundër ndryshimeve klimatike.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
