Mazhoranca dhe opozita kanë arritur marrëveshjen në lidhje me reformën zgjedhore, duke kapërcyer edhe pengesën në lidhje me përbërjen e komisioneve zgjedhore. Sipas marrëveshjes, komisionet zgjedhore do të mbeten siç janë me zotimin e depolitizimit të tyre pas zgjedhjeve të radhës. Partia Demokratike e cilësoi fitore.
“Sot në ora 10.00, PD propozoi zgjidhjen për depolitizimin e administratës zgjedhore me përjashtimin e administratës publike nga komisionet zgjedhore. PS e refuzoi. Komisionet zgjedhore mbeten sicc janë. Depolitizimi i administratës zgjedhore do të kryhet vetëm pas zgjedhjeve të ardhshme parlamentare dhe lokale”, deklaroi përfaqësuesi i PD-së në Këshillin Politik, Oerd Bylykbashi.
Palët kanë rënë dakord për identifikimin biometrik, por duke pajtuar një ekspertizë të huaj nga Bashkimi Europian që të përcaktojë shkallën e shtrirjes së zbatimit të teknologjisë dhe nëse është e mundur shtrirja në të gjithë vendin, megjithëse parimisht mes palëve është rënë dakord që të zbatohet 100 për qind.
Përfaqësuesi i socialistëve, Damian Gjiknuri tha se mazhoranca u tërhoq nga rekomandimi i ODIHR për depolitizimin e administratës zgjedhore për të shmangur bojkotin e zgjedhjeve nga Partia Demokratike.
"Pavarësisht se rekomandimi i është që administrata të ishte e depolitizuar, PD nuk ishte gati, por është e rëndësishme që tani kemi rregulla të pranuara. Administrata e balancuar politike do të funksionojë edhe në zgjedhjet e 2021. E rëndësishme që PD hoqi dorë nga kërkesat absurde, nga qeveria tranzitore, u pranua që administrimi zgjedhor nuk ka ccaluar. U kthyen te institucionet. E rëndësishme është që ne ta pranojmë dhe ta zbatojmë këtë sistem dhe në zgjedhjet e tjera të fillojë depolitizimi”, tha Gjiknuri.
Rudina Hajdari tha se kishte marrë premtimin e SHBA për të diskutuar ndryshimin e sistemit zgjedhor në një moment të dytë.
"Mora garanci nga SHBA e BE se bisedimi për ndryshimin e sistemit do të vazhdojë, do të vijojmë të flasim për ndryshimin e sistemit dhe ligjin për referendumet. E rëndësishme është dhe vota e diasporës", tha ajo.
Oerd Bylkykbashi dhe Petrit Vasili ngjitën shkallët e Pallatit të Kongreseve në orën 19.30. Ndryshe nga herët e tjera, takimi I Këshillit Poliytik për reformën zgjedhore nuk u zhvillua në rezidencën amerikane, por aty ku nisën edhe mbledhjet dhe përpjekjet për konsensus.
Anëtarët e opozitës në Këshill kishin vetëm një letër në dorë, që paraprakisht mësohet se është drafti i marrëveshjes për reformën zgjedhore.
Burimet thanë për gazetën “Si” se ka tym të bardhë për administrimin e zgjedhjeve, por vetëm pas mbledhjes, palët do të sqaronin më hollësisht se cila është formula e përbashkët, duke shmangur edhe ndonje surprize te fundit.
Kreu i Partisë Demokratike, Lulzim Basha tha se marrëveshja garanton zgjedhje të lira dhe të ndershme.
“Sot kemi hedhur një hap përpara, për të mundësuar më shumë garanci për zgjedhje të lira dhe të ndershme në Shqipëri. PD dhe Opozita e Bashkuar është e gatshme dhe po punon përditë për t'ua kthyer qeverisjen shqiptarëve. Në emër të Opozitës së Bashkuar ju shpreh falenderimet tona aleatëve dhe partnerëve tanë euro-atlantikë për ndihmën dhe kontributin e tyre për gjetjen e dakortësisë për administrimin zgjedhor”, shkroi Basha në Twitter
Kryeministri Edi Rama nuk e fshehu pakënaqësinë me marrëveshjen e arritur, e cilëson atë si të kushtëzuar për negociatat me Bashkimin Europian, por thotë se marrëveshja është ashtu siç e deshi Lulzim Basha.
“Pas 3 vjetësh marshim e 3 netësh ngujim na sollën fjalën e fundit: "Mirë e kishim ashtu siç e kishim". Po mirë, unë kam menduar e mendoj që ka edhe më mirë, po meqë LBPD janë të kënaqur me kaq për zgjedhjet e ardhshme,bujrum,si ta duan ata. Rëndësi ka që: LBPD do hyjë në zgjedhje me Kodin Zgjedhor siç e deshën vetë. ODHIR është dakord që kjo nuk e cënon lirinë e zgjedhjeve. BE është e kënaqur, Shqipëria s'ka më pikëpyetje në prag të vendimit për datën e nisjes zyrtare të negociatave. Ah po, mbaroi edhe revolucioni”, deklaroi Rama.
Pjesë e dakordësisë mes palëve për administrimin zgjedhor është edhe riformatimi i KQZ. Ky do të jetë një organ i ndarë në tre trupa të balancuara politike. Kryetari zgjidhet me konsensus, nënkryetari nga opozita. Megjithatë, gazeta “Si” mëson se puna e Këshillit Politik nuk ka mbaruar dhe do të vijojë për çështjet e tjera në Këshill, që nuk kanë të bëjnë me administraten zgjedhore.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.