Gazeta Si- Gjykata e Lezhës ka dënuar me burgim të përjetshëm, Besnik Pjetri (Perdeda), pasi në gusht 2022 vrau ish-vjehrrin dhe ish-kunatin në fshatin Grykë Zezë të Lezhës.
Ngjarja e rëndë dyshohet se ndodhi pas konflikteve familjare, ndërsa autori ishte divorcuar me bashkëshorten para 6 vitesh. Ndërkohë, dy viktimat ishin kthyer një ditë para ngjarjes nga Italia.
Ish-gruaja e kishte denoncuar Pjetrin për dhunë në Itali, ku edhe ka bërë 2 vite burg. Ai u gjet fajtor nga gjykata për veprën penale të vrasjes dhe mbajtje pa leje të armëve të zjarrit.
Pjetri u kap nga forcat speciale pas 3 muajsh kërkime për ekzekutimin e Pjerin dhe Gent Përnjakut, përkatëisht 56 dhe 33 vjeç.
Vrasja e dyfishtë ndodhi pak para mesnatës së datës 30 gusht në fshatin Grykë Zezë të Lezhës, ku pas sherreve të vazhdueshme pas divorcit me gruan, Besnik Pjetri vrau babanë dhe vëllanë e bashkëshortes.
Pasi janë kthyer nga një darkë familjare, ata janë drejtuar për në shtëpi, ku si duket autori i dyshuar iu ka bërë pritë duke i ruajtur pranë banesës së tyre.
Burime nga familja thanë se në momentin që viktimat janë futur në banesë, autori ka hapur derën dhe ka qëlluar drejt tyre në korridorin e shtëpisë ku ka rrezikuar dhe familjarë të tjerë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.