.png)
Gazeta Si - Një ditë pas krimit për gjakmarrje në fshatin Manati të Lezhës, Florian Pervathi nuk ka shfaqur pendesë për vrasjen e 65-vjeçarit Lek Lekgjonaj.
Adoleshenti, i cili mori hak për babain e tij, që 13 vite më parë ishte vrarë nga vëllai i viktimës së djeshme, është marrë në pyetje nga grupi hetimor.
Sipas informacioneve paraprake, Pervathi është në gjendje të rënduar psikologjike. Në dëshminë e tij para prokurorëve, ai ka pranuar që e vrau ish-fqinjin për hakmarrje dhe nuk ka shprehur pendesë.
Kjo pasi në 2009-n vëllai i Lek Lekgjonaj, Ndue Lekgjonaj vrau me armë zjarri babain e 17-vjeçarit. E tronditur nga ngjarja, të njëjtën ditë nëna e të miturit i dha fund jetës.
Së bashku me vëllezërit dhe motrën e tij, Floriani mbeti jetim. Një tragjedi që fatkeqësisht, 13 vjet më vonë solli një tjetër humbje jete, atë të 65-vjeçarit Lek Lekgjonaj.
Ky i fundit kishte shkuar për t’u marrë me punë të hënën tek shtëpia e tij e vjetër kur 17-vjeçari e qëlloi për vdekje me pistoletë dy herë në kraharor. Pas krimit, adolehenti është dorëzuar në polici, ku para punonjësit të policisë pranoi se kishte vrarë fqinjin e tij.
I rritur pa të dy prindërit, duket se 17-vjeçari e ka pasur një plan të fshehtë për të vënë në vend sipas tij drejtësinë e munguar.
Për këtë ngjarje ka reaguar dhe misionari i pajtimit të gjaqeve, Pjetër Gjoka. Ai tha se është befasuar, pasi prej vitesh nuk kishte konflikte mes palëve.
Gjoka është shprehur se në 2009-ën, nga vetë viktima ka pasur një tentativë për pajtim.
Gjithashtu ai theksoi se dhe nga fisi i Pervathëve u është thënë se ka një pajtim të momentit, por jo një zgjidhje të përhershme të situatës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
