Gazeta Si- Interpoli shqiptar ka ekstraduar nga Britania e Madhe, Donald Hoxhën, i dyshuar si i përfshirë për vrasjen në bashkëpunim me tre persona të tjerë të ish-policit Roland Rexhepi rreth 15 vite më parë në Elbasan.
34-vjeçari, i akuzuar për vrasje me paramendim, fshihej në Londër ku u arrestua nga autoritetet britanike më 17 janar të këtij viti.
“U ekstradua në Shqipëri nga Mbretëria e Bashkuar, shtetasi D. H., 34 vjeç. Gjykata e Elbasanit, me vendimin e datës 21.01.2024, i ka caktuar masën e sigurisë ”Arrest në burg”, për veprat penale “Vrasja me paramendim” dhe “Mbajtja pa leje dhe prodhimi i armëve, armëve shpërthyese dhe municionit”, pasi në vitin 2009, në Elbasan, në bashkëpunim me 2 shtetas të tjerë, dyshohet se ka vrarë shtetasin R. R.”, - thuhet në njoftimin e policisë.
Vrasja
Donald Hoxha akuzohet se në datën 22 korrik 2009 në qytetin e Elbasanit në bashkëpunim me shtetasit Armand Llakaj dhe Marjus Tafaj, kanë vrarë me armë zjarri ish-policin Roland Rexhepin, pasi dyshohej se kishte tentuar që të prishte vendngjarjen në vrasjen e Sokol Çapjes dhe kishte ndihmuar autorët të largoheshin nga Elbasani.
Ish-efektivi, i njohur ndryshe edhe si “Doda” u ekzekutua me dy armë tip kallashnikov mëngjesin e 22 korrikut pranë banesës së tij teksa po shkonte te parkingu ku kishte makinën.
Në këtë moment i është afruar me motor “Zong-Zhung” njëri nga autorët e krimit, Armando Llakaj, i cili ka hapur zjarr në drejtim të Rexhepit duke e lënë të vdekur në vend. Ngjarja erdhi si rezultat i përplasjes mes bandave të qytetit të Elbasanit.
Pak kohë pas ngjarjes, policia arriti të sigurojë prova dhe të arrestojnë Marjus Tafën dhe Armando Llakajn, tashmë janë dënuar me 24 dhe 23 vite burgim, ku vijojnë të vuajnë dënimin në burgun e Peqinit.
Kush ishte Roland Rexhepi
Roland Rexhepi ka qenë agjent i antidrogës dhe shofer i drejtuesit të Policisë së Elbasanit, Edmond Koseni, në atë kohë. Dy vite më vonë atij iu vra vëllai, Ilir Rexhepi.
Roland Rexhepi është kunati i motrës së Dritan Shemes, 32-vjeçarit që u vra më 19 tetor 2006 në zonën e Don Boskos në Tiranë.
Rexhepi u dyshua se kishte tentuar që të prishte vendngjarjen në vrasjen e Sokol Çapjes dhe kishte ndihmuar autorët të largoheshin nga Elbasani, ngjarje kjo e ndodhur më 26 dhjetor 2005.
Ndërkohë, pas 12 vite nga kjo ngjarje, Interpoli shqiptar ekstradoi nga Gjermania Florind Shabanin, një nga bashkëpunëtorët e tjerë në këtë vrasje.
Identifikimi i Shabanit është kryer duke analizuar një profil ADN-je që është gjendur në një kapuç dhe një bisht cigare. Ky profil ka dalë i njëjtë me atë që ka dhe Florind Shabani.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.