Gazeta Si – Humbja e sotme në Laç ka rezultuar fatale për trajnerin Mirel Josa. Vllaznia dhe trajneri kryeqytetas kanë mbyllur bashkëpunimin, siç bën me dije klubi shkodran me anë të një njoftimi në faqen e tij zyrtare.
“Klubi i Futbollit Vllaznia njofton se ka ndërprerë me mirëkuptim bashkëpunimin me trajnerin Mirel Josa. Falenderojmë trajnerin Josa për kontributin e dhënë në drejtimin e ekipit duke i uruar suksese në angazhimet e ardhshme! Ekipi do vijojë punën nën drejtimin e trajnereve Auron Miloti dhe Vioresin Sinani”, - shkruhet në njoftim.
Sipas këtij njoftimi, nuk kemi të bëjmë me dorëheqje të Josës, apo largim të tij nga Vllaznia, por një mbyllje bashkëpunimi me konsensus. Kjo ishte hera e dytë që Josa drejtonte Vllazninë në karrierë.
Drejtimi i skuadrës u është besuar tashmë dy shkodranëve, ndihmësit të Josës Vioresin Sinani, si dhe Auron Milotit, që deri tani ka pasur një rol drejtues në skuadër. Vllaznia mban vendin e 5-të, me 37 pikë pas 26 ndeshjesh.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.