.png)
Ikona e modës Virgil Abloh ka ndërruar jetë pas një beteje me kancerin.
Bota e modës është në zi për humbjen e Virgil Abloh në moshën 41-vjeçare për shkak të një kanceri të rrallë. Abloh ishte drejtori artistik i Louis Vuitton dhe krijuesi i markës Off-White, i cili gjatë viteve bashkëpunoi ngushtë me shumë të famshëm, duke përfshirë Kanye West dhe Hailey Baldwin. Lajmi për vdekjen e tij pas një beteje dyvjeçare me kancerin u bë i ditur përmes faqes së tij në Instagram.
“Për më shumë se dy vjet, Virgil luftoi me guxim një formë të rrallë, agresive të kancerit, angiosarkoma kardiake. Ai zgjodhi ta duronte betejën e tij vetëm që nga diagnoza në vitin 2019, duke iu nënshtruar trajtimeve të shumta sfiduese, të gjitha ndërkohë që drejtonte disa institucione të rëndësishme që përfshijnë modën, artin dhe kulturën”, thuhet në njoftim.
Abloh lindi më 30 shtator 1980 në Rockford, Illinois nga Nee dhe Eunice Abloh.
Ai ra në dashuri me modën ndërsa ishte duke studiuar për Master në Arkitekturë në Institutin e Teknologjisë në Illinois, ku u diplomua në vitin 2006.
Virgil Abloh u takua për herë të parë me reperin Kanye West në vitin 2007.
“Kanye nuk pranonte të ndërhyja dhe të më jepte drejtimin e stilit të tij por tha: “Unë do të të punësoj dhe le të punojmë bashkë për të bërë diçka të bukur”, kujtoi Virgil në 2019.
Dyshja më pas bashkëpunuan në bashkëpunimin e parë të Kanye për atletet me Louis Vuitton në vitin 2009, gjë që bëri veshjet e rrugës të rëndësishme në botën e modës.
“Kur unë dhe Kanye shkuam për herë të parë në shfaqjet e modës, nuk kishte njeri jashtë shfaqjeve. Veshjet e rrugës nuk ishin në interesin e askujt. Ky ishte momenti që fillova të hartoj idetë e mia”, tha Abloh.
Më vonë ai punoi si drejtor kreativ në albumin dhe turneun e Kanye dhe Jay-Z “Watch The Throne” në 2011.
Ai mori sundimin e linjës së meshkujve të Louis Vuitton si Drejtor Artistik në 2018, një rol që më parë e kishte mbajtur ikona e modës, Marc Jacobs.
"Kur isha në kolegj, Marc Jacobs ishte stilisti amerikan që shkoi në Europë dhe i dha jetë Louis Vuitton duke sjellë Takashi Murakami ose Stephen Sprouse", tha Abloh një vit pas emërimit historik, që e bëri atë njeriun e parë me ngjyrë që drejtonte një markë aq të njohur.
Off-White është bërë një nga markat më me ndikim të modës bashkëkohore vitet e fundit, duke kombinuar modën e lartë dhe veshjet e rrugës. Abloh themeloi labelin në Milano në vitin 2012, i cili shpejt u bë një markë e preferuar nga Rihanna, Kylie Jenner, Beyonce, Travis Scott dhe më shumë.
Ai dizajnoi gjithashtu fustanin e nusërisë së Hailey Baldwin për dasmën e saj me Justin Bieber në vitin 2019.
“Virgil Abloh faleminderit që bëre vizionin tim të jetësohet dhe krijove fustanin tim të ëndrrave”, shkroi ajo në një postim në Instagram pas dasmës.
Virgil u martua me Shannon Abloh në 2009. Ata ishin prindër të fëmijëve Lowe dhe Grey.
Virgil Abloh besonte në përralla. Bashkëpunimi i tij "The Ten" me Nike, në vitin 2017, e pa atë të vraponte si fëmijë në arkivin e Nike, duke ndërthurur Nike me Converse (që atëherë ishte një jo e madhe).
Menjëherë pas kësaj, ai bëri një shfaqje të Off-White me temë rreth Princeshës Diana, një tjetër person publik që besonte në përralla.
Abloh besonte se është një hero që pavarësisht çdo gjëje, merr gjithçka që ka dashur.
Çuditshmëria, magjia, dashuria dhe e bukura tek e dukshmja. Këto i sillte Virgil Abloh.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
