.png)
Vetëm pak ditë e humbi kryesimin Interi, që me fitoren e sotme ndaj Fiorentinës ka parakaluar Napolin dhe ka marrë sërish komandën. Një fitore me përmbysje për kampionët në fuqi të Italisë në Firence.
Sotil realizoi për të zotët e shtëpisë në pjesën e parë dhe u duket se për skuadrën e Inzagit kjo ndeshje u bë një malore e fortë. Kapiteni Handanovic e mbajti ekipin në lojë me disa pritje dhe pastaj situata u përmbys brenda dy minutash, me golat e Darmian dhe Xhekos. Interesant është fakti se trajneri Inzagi kishte bërë gati ndërrimet për të dy këta lojtarë, por për fatin e tij dhe të Interit ata shënuan para se të linin fushën e blertë.
Golin e tretë për zikaltrit e realizoi Perisiç në fundin e ndeshjes. Më parë Fiorentina kishte mbetur me 10 vetë, pasi Niko Gonzales u ndëshkua me karton të kuq për protesta. Interi i këtij sezoni është vërtet një makineri golash.
Në 5 ndeshjet e deritanishme zikaltrit kanë shënuar 18 gola, më shumë se çdo skuadër tjetër, me një mesatare prej mbi tre golash për ndeshje, ndërkohë që kanë pësuar 5 gola. Kampionët udhëheqin Serinë A me 13 pikë, 1 më shumë se Napoli, që ka një ndeshje më pak.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
