.png)
Gazeta Si - Për dy orë, ish-presidenti dhe kreu i Partisë së Lirisë ka dëshmuar këtë të mërkurë në SPAK në lidhje me aferën CEZ-DIA.
Ai akuzoi kryeministri Rama se po e përdor politikisht këtë çështje për të shmangur vëmendjen nga skandalet e qeverisë.
Pasi doli nga ambientet e Prokurorisë së Posaçme, Meta deklaroi se nuk është i përfshirë dhe se nuk ka asnjë akt të firmosur nga ai në interes të askujt për këtë çështje.
“Një person që ka qenë punonjës i DIA-s, tani është punonjës i OSHEE dhe përdoret nga regjimi për shpifje. Një person që ka vënë në gjykatë një dëshmi, ku asgjëkund nuk ka përmendur emrin tim, - u shpreh Meta. - Përgjigja ime është ajo që ka qenë më parë, do ta them përsëri nuk ekziston asnjë akt, asnjë shkresë, asnjë dokument, asnjë urdhër, asnjë iniciativë për ligje, akte nën ligjore nga Ilir Meta si zv.kryeministër apo si ministër i Ekonomisë në interes të askujt. Unë isha si një person që ka dijeni për rrethana të ngjarjes. U pyeta për detaje të ndryshme, të cilat nuk kanë asnjë rëndësi”.
I pyetur nëse ka njohje me të vetmin të dënuar për këtë aferë Kastriot Ismailaj, Meta e mohoi në mënyrë absolute.
“Kam dhënë shpjegime në të kaluarën, edhe para opinionit publik. Asnjë vendim nga Ilir Meta nga pozitat e tij shtetërore në interes të askujt. Kjo është shumë e qartë, është një çështje që diktohet politikisht nga Edi Rama për të shmangur vëmendjen nga skandalet e jashtëzakonshme e për ta spostuar në thashetheme. Nuk kam asnjë interes për dëshmitë që ka SPAK, është detyra e tij të hetojë, jetojmë në kohë ku kallëzuesit e rremë janë bërë modë, sepse kemi një qeveri që kërkon të shmangë vëmendjen nga skandalet, që nga inceneratorët që sot e kësaj dite vetëm sa është prekur pak në sipërfaqe”.
Përveç kryeministrit Rama, Meta akuzoi drejtësinë shqiptare për keqpërdorim politik të kësaj çështjeje.
“Nuk më habit asnjë keqpërdorim i drejtësisë, nuk më shqetëson fare. Unë jam këtu përballë jush dhe para qytetarëve dhe askush nuk duhet të ketë iluzonin se në këtë mënyrë do arrijnë të ç’fokusojnë Metën apo opozitën nga beteja kundër këtij regjimi Unë jam këtu, s’jam për të dhënë përgjigjie për çdo lloj mashtruesi që vetëofrohet për interesat e tij. Asgjëkundi s’është përmendur emri im, dirigjohet nga vetë Rama”, theksoi ish-presidenti.
Në një deklaratë të shkurtër para se të futej në SPAK, ai e cilësoi çështjen një “telenovelë” që është gjykuar dy herë dhe është rihapur në vitin 2019 nga një kallëzues i rremë.
"Është një telenovelë, e cila është e gjykuar nja dy herë, e cila është rihapur për rastin konkret në dhjetor të vitit 2019 nga një kallëzues i rremë i cili është dënuar dy herë nga gjykatat për shpifje dhe është dënuar dhe për dhunë në familje”, - u shpreh ai.
Në shkurt të këtij viti, Meta ka dhënë rreth 3 orë dëshmi SPAK si person që ka dijeni për çështjen CEZ-DIA.
Hetimet e SPAK lidhen me privatizimin e kompanisë dhe dyshimet për abuzime me mbledhjen e borxheve.
Paraqitja e Metës para prokurorëve të posaçëm, vjen vetëm një ditë pasi ish-këshilltari i tij në presidencë Ilir Kulla qëndroi për më shumë se dy orë në këtë prokurori.
Teksa ka qenë duke u futur në ambientet e SPAK, Kulla tha për gazetarët që nuk e di se për çfarë e kanë thirrur. Por edhe teksa doli nga SPAK, Kulla preferoi ta mbajë sekret çështjen për të cilën është pyetur.
Kulla u shpreh se në SPAK ka dhënë dëshmi për disa rrethana, por nuk zbuloi më tepër detaje për shkak të sekretit hetimor. Ende nuk dihet për çfarë është paraqitur në SPAK.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
