Gazeta Si - Deputeti i Partisë Demokratike Flamur Noka është paraqitur këtë të martë në ambientet e Prokurorisë së Posaçme kundër Korrupsionit dhe Krimit të Organizuar (SPAK).
Pas deklarimeve të tij para prokurorëve të SPAK, Noka tha se dy kanë qenë çështjet për të cilat ai është pyetur, për kryetaren e Bashkisë së Roskovecit, Majlinda Bufin dhe për platformën “Aktivisti” të përdorur nga socialistët.
Gjatë fjalës së tij për mediat, Noka akuzon Majlinda Bufin si kërcënuese dhe shantazhuese e qytetarëve për të marrë me dhunë votën e po ashtu platformën e “Aktivistit” që sipas tij, shantazhonte administratën.
Sipas Nokës, kallëzimi është bërë për dy vepra penale, “Shpërdorim detyre” dhe “Kanosje apo dhunim ndaj pjesëmarrësve në zgjedhje”.
Ai vëren se administratorja e kësaj bashkie “ka kryer me dashje dhe personalisht gjatë fushatës zgjedhore shkelje të rënda kundër punonjësve të administratës publike”.
Kjo, për t’i penguar ata të votojnë lirisht, shkelje si kërcënime, presione dhe shantazhe.
“Siç jeni në dijeni në këtë fushatë zgjedhore, Rilindja ka bërë një batërdi dhe në këtë aspekt, ne kemi monitoruar dhe kemi paraqitur në SPAK një mori padish për këtë batërdi.
Sot isha për të diskutuar në lidhje me dy çështje. Në lidhje me zonjën Majlinda Bufi si kërcënuese, shantazhuese e qytetarëve për t’u devijuar me dhunë votën dhe për të famshmen çështjen të Aktivistit, që po ashtu shantazhonte dhe survejonte administratën.
Këto të dyja janë krime të rënda zgjedhore dhe ne do i shkojmë deri në fund.
Të gjitha provat që disponojmë janë dorëzuar dhe çdo dokument që do kemi, do e dorëzojmë.
Fakti që jam këtu do të thotë se hetim penal ka për zonjën Bufi dhe çështjen e Aktivistit,” tha Noka.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.