Gazeta Si – Nuk ishte e thënë që Kosova të festonte për fitoren e parë në Grupin I të kualifikueseve të Europianit 2024. ‘Dardanët’ e dominuan me raste ndeshjen në terrenin e rënduar të stadiumit ‘Fadik Vokrri’ për shkak të shirave, por nuk ia dolën për të mundur Rumaninë.
Ndeshja e luajtur në Prishtinë u mbyll me rezultatin 0-0 dhe ky ishte barazimi i tretë në tri ndeshje për skuadrën e trajnerit Alen Zhires, që tani mbase rrezikon vendin e punës.
Në minutën e 69-të Kosovës iu anulua një gol i shënuar nga Edon Zhegrova, i futur në fushë si zëvendësues. Lojtari i Lilës e dërgoi me kokë topin në rrjetë, por pas rishikimit të pamjeve në VAR rezultoi se Celina ishte në pozicion të parregullt.
‘Dardanët’ ngulmuan në minutat e mbetura për golin e fitores dhe Muriqi i kishte të gjitha mundësitë për të qenë ‘heroi’ i mbrëmjes. Zhegrova kaloi dy mbrojtës rumunë në zonë nga e djathta dhe pasoi për Muriqin e lirë, por ai gjuajti mbi tra. Një shans i artë i humbur nga sulmuesi shtatlartë.
Me 3 pikë në 3 ndeshjet e para, Kosova mban vendin e 4-t në grup, me llogari mjaft të komplikuara për një kualifikim të mundshëm. Grupi kryesohet nga Zvicra me 9 pikë, më pas vjen Rumania me 7 pikë dhe Izraeli me 4 pikë. Kosova lë pas vetëm Andorrën dhe Bjellorusinë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.